Փաստ ինֆո

Անկախ դատական համակարգ ունենալը մեկ օրվա գործ չէ, ԵԱՀԿ շատ անդամ պետություններում  դեռ կան որոշ դժվարություններ՝ սահմանադրական երաշխիքները իրականացնելու առումով:  ԵԱՀԿ երևանյան գրասենյակի, ԵԱՀԿ Ժողովրդավարական հաստատությունների եւ մարդու իրավուքների գրասենյակի /ԺՀՄԻԳ/  և Եվրախորհրդի նախաձեռնությամբ  այսօր մեկնարկած  փորձագիտական աշխատաժողովի բացմանը այս մասին հայտարարեց ԵԱՀԿ երևանյան գրասենյակի ղեկավար, Դեսպան   Անդրեյ Սորոկինը:  Նա հավաստիացրեց, որ ԵԱՀԿ անդամ պետությունները պատրաստ են  աջակցել անկախ դատարանների ու անկախ դատավորների կայացմանը՝ դատավորները և   ամբողջ դատական իշխանությունը  պետք է անօրինական ճնշումներից ու ազդեցություններից  պաշտպանված լինեն:

ՀՀ վճռաբեկ դատարանի  քրեական պալատի նախագահ Դավիթ Ավետիսյանը կարծիք հայտնեց, որ աշխատաժողովի շրջանակներում քննարկումները ժամանակին  ու անհրաժեշտ են:   Ըստ նրա, ԵԱՀԿ կիևյան հանձնարարականների շարքում  անչափ կարևոր են դատավորների ներքին անկախության հարցերը՝  դատավորը լիարժեք անկախ լինելու համար պետք է ունենա նաև ներքին անկախություն:  Ըստ Կիևի  հանձնարարականների, դատարանների նախագահները պետք է որոշակի ժամկետով ընտրվեն: Դատարանի նախագահ դառնալու համար երկու կարգերից՝ ռոտացիոն ու ընտրությունների  հիման վրա, Կիևի հանձնարարականներով նախապատվություն է տրվում երկրորդին:

«Փաստինֆո»-ի թղթակցի հետ զրույցում Դ.Ավետիսյանը նշեց, որ կիևյան  հանձնարարականները ամենահասուն իրավական փաստաթուղթն է, որը հաշվի է առել ամբողջ Եվրոպայի զարգացած իրավական ավանդույթները և դա ներառել է փաստաթղթում: 2012-2016թթ. դատաիրավական բարեփոխումների  ծրագիրը պետք է հենվի Կիևյան հանձնարարականների դրույթների վրա, ըստ որոնց, մասնավորապես,   դատարանների նախագահները պետք է պաշտոնավարեն որոշակի ժամկետով, ընդ որում՝ նրանք պետք է ընտրվեն:  «Ես կարծում եմ, որ սա դատավորների  ներքին անկախության համար  շատ կարևոր գործոն  կարող է հանդիսանալ»,- ասաց Դ.Ավետիսյանը՝ կարևորելով դատավորների առաջխաղացման հետ կապված կոնկրետ չափանիշների սահմանումը՝ օրենսդրության մակարդակով:  Ըստ նրա, վերջինս  կարևոր է   դատավորի արդարադատական  գործառույթի արդյունավետության ու նաև կանխատեսելիության տեսանկյունից.  «Դատավորի   համար պետք է նաև իր ապագա ճակատագիրը կանխատեսելի լինի և հիմնված լինի կոնկրետ չափանիշների վրա»,- ասաց նա:

Լրագրողների հետ զրույցում ՀՀ արդարադատության նախարարի պաշտոնակատար  Հրայր Թովմասյանն ընդգծեց, որ Կիևյան հանձնարարականներն ըստ էության դրված են Դատաիրավական բարեփոխումների քառամյա ռազմավարական ծրագրի հիմքում:

Ի դեպ  երկօրյա փորձագիտական աշխատաժողովի ընթացքում  կքննարկվի  Հայաստանի Հանրապետությունում իրավական և դատական բարեփոխումների 2012-2016 թվականների ռազմավարական ծրագրի իրականացման ընթացքը: Քննարկման մասնակիցները կվերլուծեն  դատական վարչարարության ու ինքնակառավարման մարմինների,  դատավորներին կարգապահական պատասխանատվության ենթարկելու ընթացակարգերի ու հիմքերի բարեփոխումների, դատավորների գործունեության գնահատման օբյեկտիվ չափանիշների ու ընթացակարգերի ներմուծման  հարցերը: