Փաստ ինֆո

ԱԻՄ նախագահ Պարույր Հայրիկյանը չի վիրահատվի և բուժումը կշարունակի դեղորայքային և ֆիզեո կոչված վերականգնողական մարզումային աշխատանքներով, սակայն ամբողջական ապաքինման երաշխիք չի տրվում։ Այս մասին ֆեյսբուքում գրել է Պարույր Հայրիկյանը։

«Այսօր ուզում էի ձեզ հայտնել, որ երկարատև ստուգումներից ու քննարկումներից հետո հոլանդական հայտնի Էրազմուս բժշկական կենտրոնի մասնագետները եկան այն եզրակացության, որ ապաքինումս պետք է ընթանա առանց վիրահատության՝ դեղորայքային և ֆիզեո կոչված վերականգնողական մարզումային աշխատանքներով։ Սա այն դեպքում, երբ մեր Հայաստանցի մասնագետներն ի վերջո միահամուռ համաձայնեցին Հայֆայի Շեմեռ բժշկական կենտրոնի բժիշկների այն կարծիքի հետ, որ շտապ վիրահատում է պետք։ Ինձ սարսափեցնողն այն է, որ այդ ընթացքում ամբողջական ապաքինման որևէ երաշխիք չի տրվում, որ կիլոգրամներով ցավազրկողներ եմ ընդունելու և գործընթացը տևելու է մոտ երեք ամիս (գուցե և ավելի, ինչի մասին դեռ Երևանում ինձ զգուշացնում էր բարեկամս՝ այդ գործի մեծ մասնագետ Արտավազդ Սահակյանը)...

Հնարավորություն կա նաև մերձակա Բելգիայի մասնագետներին լսելու և արդեն նախնական քայլեր արել եմ, բայց վաղը չէ մյուս օրվանից սկսելու են բուժումները։ Եթե նկատեմ, որ հատուկ որակ չեն ներկայացնում եւ հիմնական գործոնը ժամանակն է, ապա ամեն բան կթողնեմ ու կվերադառնամ Հայաստան»,- նշել է Պ.Հայրիկյանը։

Նա միաժամանակ իր մտորումներն է ներկայացրել տեղի ունեցող քաղաքական զարգացումների մասին։

«Նկատում եմ, որ լրատվական միջավայրն արդարացված կամ չարդարացված ամբողջությամբ հագեցած է ապրիլի 9-ով։ Այդ օրվա հետ ինչ-որ հույսեր կապողները դժվար թե կարողանան հոդաբաշխ բացատրել, թե հատկապես ինչ են սպասում։ Վախեցողներն էլ, չգիտեն, թե ինչից են վախենում...

Եվ բոլորը միասնաբար լռում են մի կարևոր ու շատ ակնհայտ իրողության մասին։ Զանգվածաբար իրենց ավանակի տեղ դնելով ճշմարտության առաքյալ լինելու հայտ են ներկայացնում։

Հանրության հաճելի ստեր ու առասպելներ հնարելով, դու միայն դրանց քանակն ես ավելացնում և մազաչափ իսկ չես մոտենում Ճշմարտությանը, ավելին՝ հեռանում ես նրանից։

Եվ սա այն դեպքում, երբ ցանկացած մարդ գիտե, որ առանց Նրա ոչինչ տեղի չի ունենում...

Բավարարվեմ այսքանով. թող ես չլինեմ սրանց շքերթի ժամանակ անձրև բերողը։ Բայց հետո կխոսեմ, ուղղակի պարտավոր եմ խոսել»,- ավելացրել է Պ.Հայրիկյանը։

Հիշեցնենք, որ 2013 թվականի հունվարի 31-ին` ժամը 23:20-ի սահմաններում, Երևան քաղաքի Տպագրիչների փողոցի 9-րդ շենքի 7-րդ մուտքի դիմաց. անհայտ անձը հրազենից կրակոցներ էր արձակել տուն վերադարձող ՀՀ Նախագահի թեկնածու, Ազգային Ինքնորոշում Միավորում կուսակցության նախագահ Պարույր Հայրիկյանի վրա ու դիմել փախուստի: Մահափորձը պատվիրելու համար մարտի 5-ին մեղադրանք է առաջադրվել ՀՀ նախագահի նախկին թեկնածու Վարդան Սեդրակյանին և նրա նկատմամբ որպես խափանման միջոց է կիրառվել կալանքը։