Փաստ ինֆո

ԱԺ նախկին պատգամավոր, նախկինում ՀՀԿ-ական, այսօր արդեն ԲՀԿ անդամ Զոհրաբ Զոհրաբյանի առողջական վիճակի մասին «Արմենիա» ԲԿ-ն հրաժարվում է տեղեկություններ տրամադրել։

Չնայած մեր բազմաթիվ փորձերին գլխավոր բժշկի հետ ընդհանրապես խոսել չհաջողվեց, իսկ բուժհիմնարկի աշխատակցուհին իր «սրտացավ» վերաբերմունքը դրսևորելով մյուս հիվանդների նկատմամբ ասաց, որ իրենք բազմաթիվ հիվանդներ ունեն և որ իրենց պարտքն է հիվանդներին օգնություն ցույց տալ և ոչ թե լրագրողներին տեղեկություն տրամադրել մի հիվանդի մասին:

ԲԿ-ի վերակենդանացման բաժանմունքի վարիչ Սուրեն Մակարյանն էլ իր հերթին նշեց, որ հիվանդանոցի ադմինիստրացիային դիմենք, քանի որ հրաման է եղել, որ Զոհրաբյանի առողջական վիճակի մասին որևէ տեղեկություն չհաղորդվի:

Զոհրաբ Զոհրաբյանի ընկերոջ փոխանցմամբ՝ նրա առողջական վիճակ ստաբիլ ծանր է: Ինչպես «168.am»-ին հայտնել է Զոհրաբյանի ընկերը, նա արդեն գիտակցության է եկել, բայց դեռևս շնչում է շնչառական սարքի օգնությամբ: Համակարգչային տոմոգրաֆիայի հետազոտական արդյունքները ցույց են տվել, որ Զոհրաբյանի գլխին բարեբախտաբար վնաս չի պատճառվել, սակայն վնասվել են նրա երկու թոքերը:

«168.am»-ի փոխանցմամբ՝ Զ. Զոհրաբյանի թոքերը սկսել են գործել, բայց ընդամենը 20 տոկոսով: Բժիշկները հայտնում են, որ նրա կյանքին վտանգ չի սպառնում:

Հիշեցնենք, որ ապրիլի 4-ին՝ ժամը 23:50-ի սահմաններում Հրաչյա Քոչար փողոցի՝ դեպի Արաբկիր վարչական շրջանի շենք տանող հատվածում (բենզալցակայանի մոտ) ԱԺ նախկին պատգամավոր Զոհրաբ Զոհրաբյանի Սուզուկի մակնիշի մեքենան վթարի էր ենթարկվել, ինչի արդյունքում Զոհրաբ Զոհրաբյանն անգիտակից վիճակում տեղափոխվել էր հիվանդանոց։