Փաստ ինֆո

Ինչպես տեղեկացնում է թերթը, Հայաստան է ժամանել ՌԴ խոշորագույն նավթային ընկերության` «Ռոսնեֆտ»-ի պաշտոնական պատվիրակությունը և հավելում, որ հանդիպման ընթացքում շոշափվել է «Նաիրիտի» թեման:

Ըստ «Ռոսնեֆտ»-ի կայք-էջի` աշխատանքային այցի ընթացքում Իգոր Սեչինն այցելել է «Նաիրիտ»:

«Այս տարիների ընթացքում ռուսական պարտքի մայր գումարը հասել է 175մլն դոլարի, իսկ տոկոսների մի մասը` 25մլն դոլարի չափով, ներկայումս «Մեժգոսբանկը» փորձում է ստանալ Մոսկվայի արբիտրաժային դատարանի միջոցով: Դատական վերջին նիստին «Նաիրիտի» ներկայացուցիչը չի ներկայացել»,- գրում է թերթը:

Դատական հաջորդ նիստը Մոսկվայում նշանակվել է մայիսի 14-ին:

«Բացառված չէ, որ հենց «Ռոսնեֆտ»-ի ղեկավարության ներկայիս այցի ընթացքում էլ կորոշվի դատաքննության հետագա ընթացքը: Եթե կողմերը համաձայնության գան, Հայաստանը ԵվրազէՍ հիմնադրամից կստանա 400 մլն դոլարի վարկ` «Նաիրիտի» արդիականացման համար, որի առաջին տրանշը` 125մլն. դոլարը, կուղղվի «Նաիրիտի» կուտակած պարտքերը մարելուն: Հայաստանի համար սա լավագույն տարբերակը կլինի, քանի որ գործարանը վերջապես կաշխատի և ճիշտ կառավարման դեպքում ահռելի օգուտ կբերի պետությանը» ,- վերլուծում է թերթը:

Թերթը միաժամանակ տեղեկացնում է, որ ՀՀ ֆինանսների նախարարությունն ավարտել է «Նաիրիտ»-ում ստուգումները, նյութեր նախապատրաստել, որոնց մի մասն ուղարկվել է ՀՀ դատախազություն:

«Ո՞ւր կտանեն քննության թելերը, ի՞նչ խախտումներ կհայտնաբերեն իրավապահները, կհարուցվե՞ն գործեր` հափշտակությունների, յուրացումների, վնասարարության հոդվածով, թե՞ կփակվեն, հավանաբար նույնպես կախված է ռուսական կողմի հետ բանակցությունների արդյունքներից:

Ի դեպ, վնասարարության հոդվածով ՀՀ-ում դեռևս ոչ ոք չի դատվել»,- եզրափակում է թերթը: