Փաստ ինֆո

Թերթը գրում է, որ հայտնի են դեպքեր,երբ ընդդեմ Հայաստանի Հանրապետության` ՄԻԵԴ-ում կայացվել են վճիռներ` հօգուտ բողոքը ներկայացնողների, որոնց արդյունքում պետությունը նրանց խոշոր գումար է փոխհատուցել:

Թերթի թղթակիցը «Արնի քնսալթ» փաստաբանական գրասենյակի փոխտնօրեն, միջազգային իրավունքի մասնագետ Արա Ղազարյանից հետաքրքրվել է, թե ներկայումս քանի նման հայց կա Եվրադատարանում: Նա պատասխանել է, որ 2012թ. դեկտեմբերի 31-ի դրությամբ ՄԻԵԴ-ում ընդդեմ Հայաստանի Հանրապետության 950 բողոք կա, որոնք դեռևս ընթացքի մեջ են:

Ըստ Ա.Ղազարյանի` բողոքներն ամենատարբեր բնույթի են: «Ամենաշատը կալանքի հետ կապված խախտումներն են արձանագրվել, հետո գալիս են գույքային իրավունքի խախտումները, գերակշռում է, իհարկե, կալանքը»:

Սակայն Ա.Ղազարյանի կարծիքով` դրական միտումներ շատ կան, կալանքի վերաբերյալ որոշ համակարգային խնդիրներ լուծվել են, դիմումներն արդեն Եվրոպական դատարան չեն գնում:

Թղթակցի այն հարցին, թե ՄԻԵԴ-ում ընդդեմ Հայաստանի Հանրապետության բողոքները տարեցտարի ավելանում, թե պակասում են, Ա.Ղազարյանը պատասխանել է. «Դժվարանում եմ ասել. միայն կասեմ, որ կտրուկ աճ չկա և չկա երկու պատճառով:

Մեկն այն է, որ որոշ խնդիրներ այստեղ տեղում լուծվում են, երկրորդ` որ Եվրադատարանը շատ ծանրաբեռնված է աշխատում, և շատ երկար է տևում մինչև վճիռը կայացվում է, ապա դրանց շատ մարգինալ մոտեցում է ցուցաբերվում:

Եվրադատարանը շատ դեպքերում մարգինալ մոտեցում է ցուցաբերում, չի ցանկանում խնդիրը խորությամբ ուսումնասիրել, քանի որ դա արդեն ուսումնասիրվել է ազգային դատարանների կողմից»,- ասել է Ա.Ղազարյանը: