Փաստ ինֆո

Կոնդ թաղամասում խուլիգանական դրդումներով կատարված սպանության գործով հիմնական ամբաստանյալ, նախկինում 2 անգամ դատապարտված Հարություն Թանապուրյանն այսօր դատապարտվեց 18 տարվա ազատազրկման:

Այսպիսով, Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը հիմնավորված համարեց, որ հենց Թանապուրյանն է 2012թ. հունվարի լույս 4-ի գիշերը՝ ժամը 01.00-ի սահմաններում,  Կոնդում սպանել Մերուժան Մինասյանին:

Գործով մյուս ամբաստանյալը՝ Հարություն Մկրտչյանը դատարանի դատավճռով դատապարտվեց 3 տարի  8 ամիս 7 օր ժամկետով, նրա նկատմամբ խափանման միջոց ընտրված չհեռանալու մասին  ստորագրությունը փոփոխվեց կալանքի և նա  արգելանքի վերցվեց  ամիջապես դատական նիստերի դահլիճից:  Մեղադրող դատախազը միջնորդել էր Հ.Թանապուրյանին դատապարտել 19 տարվա, իսկ Հ.Մկրտչյանին`  4,5 տարվա ազատազրկման:

Նշենք, որ մինչ դատավճռը,  Թանապուրյանի պաշտպան Ավագ Լալայանը հանդես  եկավ ճառով` առարկելով արարքի որակման դեմ: Ըստ նրա,  իր պաշտպանյալի գործողությունները չէին կարող որակվել որպես խուլիգանություն, քանի որ   գործի նյութերով հիմնավորված չէ: Իսկ Մկրտչյանի պաշտպան Յուրիկ Խաչատրյանն էլ նշեց, թե իր կարծիքով Հ. Մկրտչյանին առաջադրված  մեղադրանքը հիմնավորված  չէ` դատարանին խնդրելով  դադարեցնել նրա  նկատմամբ քրեական հետապնդումը  և գործը կարճել, թեեւ ինքը` ամբաստանյալն առաջադրված մեղադրանքում իրեն մեղավոր է ճանաչել:

Ելնելով իր պաշտպանյալի շահերից Յուրիկ Խաչատրյանը  նաեւ միջնորդեց,  որ եթե դատարանը հիմնավորված համարի  առաջադրված մեղադրանքը, ապա նրա  նկատմամբ կիրառի ՀՀ քրեական օրենսգրքի 70 – րդ հոդվածը եւ  պատիժը պայմանականորեն չկիրառվի:

Ամբաստանյալներն իրենց վերջին խոսքում  նշեցին, որ ցավում են կատարվածի համար  և որ չեն ցանկացել,  որպեսզի  նման բան տեղի ունենա, իսկ ամբաստանյալ Հ. Մկրտչյանը դատարանին խնդրեց նաև  իր նկատմամբ մեղմ պատիժ կիրառել: