Փաստ ինֆո

«Գյումրու նախկին քաղաքապետ Վ.Ղուկասյանի դստեր փեսացուի` Կարեն Եսայանի սպանության գործով շարունակվող դատավարությունն ունի միանգամայն կանխատեսելի ընթացք»,- գրում է թերթը և հավելում, որ մեղադրյալ Հ.Սարգսյանն ինչպես նախաքննության ընթացքում, այնպես էլ դատարանում շարունակում է պնդել, որ ինքն անմեղ է:

Սակայն սպանված երիտասարդի հարազատները միանգամայն հակառակ տեսակետին են հակված:

Թերթի թղթակիցը զրուցել է Կ.Եսայանի մոր`Անահիտ Իսկանդարյանի փաստաբան Վարդուհի Էլբակյանի հետ, ով մասնավորապես ասել է. «Կարող եմ միանշանակ հայտարարել, որ ճիշտ անձի է մեղադրանք առաջադրված, գործում բազմաթիվ ապացույցներ կան:

Հ.Սարգսյանը բոլոր մեթոդներով պաշտպանվում է, ներկայացնում է, որ տեսաերիզներում ֆիքսված անձը ինքը չէ, ավելին` ոչ պատշաճ վարքագիծ է դրսևորում դատական նիստերին որդեկորույս մոր նկատմամբ: Ես, միանշանակ, ավելի քան վստահ եմ, որ այդ հանցագործությունը կատարվել է Հարություն Սարգսյանի կողմից»:

Ըստ փաստաբանի` Հ.Սարգսյանը մենակ չի եղել, նրան օգնել են: Վ.Էլբակյանը իր խոսքում շեշտել է, որ նախաքննությունից դժգոհ են, հանցագործությունն ամբողջ ծավալով չի բացահայտվել:

Թղթակցի այն հարցին, թե որն է սպանության դրդապատճառը, Վ.Էլբակյանը պատասխանել է. «Սպանության դրդապատճառները մեզ համար էլ են դեռ անհասկանալի, քանի որ մեղադրյալ Հ.Սարգսյանը և Վարդան Ղուկասյանի դուստրը միմյանց չեն ճանաչել: Կարեն Եսայանը Գյումրիում չի բնակվել և որևէ թշնամի չի ունեցել»: