Փաստ ինֆո

Դեռևս 2012թ. մարտի 20-ին Հայաստանում հրեական համայնքի ղեկավար Ռիմա Վարժապետյանի բնակարանից գողացել էին նրա ոսկեղենը: Թերթի թղթակիցը զրուցել է Ռ.Վարժապետյանի հետ, ով հայտնել է, որ մեկ տարի է անցել, բայց միայն վերջերս է ոստիկանությունն ինչ-որ մեկին իրենց տուն բերել, ով հաստատել է, որ ինքն է մտել բնակարան ու գողություն կատարել: Սակայն մինչ օրս Ռ.Վարժապետյանի ոսկեղենն իրեն չեն վերադարձրել:

Թերթը հիշեցնում է, որ Ռ.Վարժապետյանը դիմել էր ոստիկանության Արաբկիրի բաժին ` գողերին գտնելու ակնկալիքով:

Դեռ մեկ տարի առաջ Ռ.Վարժապետյանը թերթի թղթակցին պատմել էր, որ գողությունը կատարելու ժամանակ ինքն ու ամուսինը տանն են եղել:

«Ասեմ, որ մենք մի սովորություն ունենք. մեր բնակարանի դուռը երբեք բանալիով չենք փակում, երբ տանն ենք լինում»:

Գողության օրը տիկին Ռիման խոհանոցից դուրս գալիս նկատել է, որ ինչ որ մեկը ննջասենյակից վազքով դուրս է գալիս:

Թերթը գրում է, որ դեպքից հետո ԱԱԾ-ն էր պահպանում տիկնոջ անվտանգությունը:

«Գողության պատճառով ոչ ոք ինձ չի հսկում, երևի մեկ այլ պատճառով են հսկում: Կարծում եմ դա չեն անում, որ հսկեն իմ հարստությունը»,- ասել է Ռ.Վարժապետյանը:

Իսկ այն հարցին, թե ի՞նչ տեղաշարժ կա գործում, Ռ.Վարժապետյանը պատասխանել է. «Ոչ մի բան չկա, մի գողի էին բռնել, բերել մեր տուն, ինքն ասաց, որ` հա, մտել եմ, էս բանը ստեղ է եղել, էս բանը այնտեղ է եղել: Նկարեցին ու հեռացան: Բայց ոչ մի ապրանք, ոչ մի փող, ոչ մի արդյունք, ոչ մի բան չկա: Ինքն է եղել, թե բարդեցին իր վրա, ես չգիտեմ»:

Իսկ ԱԱԾ-ի կողմից իրեն հսկելու առթիվ Ռ.Վարժապետյանը պատասխանել է, որ ի սկզբանե ինքը չի դիմել, որ իրեն պաշտպանեն, դա պետության որոշումն է եղել: