Փաստ ինֆո

ՀՀ վերաքննիչ քրեական դատարանը՝ դատավոր Լիլիթ Թադևոսյանի նախագահությամբ, ապրիլի 8-ին կքննի «Ղարաբաղ» կոմիտեի անդամ, նախկին պատգամավոր Սամսոն Ղազարյանի վերաքննիչ բողոքն ընդդեմ ընդհանուր իրավասության դատարանի իր դեմ կայացրած մեղադրական դատավճռի: Մասնավորապես, նա խնդրում է բեկանել և փոփոխել Կենտրոն և Նորք-Մարաշ վարչական շրջանների ընդհանուր իրավասության դատարանի 2013թ փետրվարի 13-ի դատավճիռը և իր նկատմամբ կայացնել արդարացման դատավճիռ` հանցակազմի բացակայության հիմքով:

Երևանի Կենտրոն և Նորք-Մարաշ վարչական շրջանների դատարանը՝ դատավոր Արշակ Վարդանյանի նախագահությամբ, հաստատված էր համարել Ս. Ղազարյանին ներկայացված խարդախության մեղադրանքը ՀՀ քրեական օրենսգրքի 178-րդ հոդվածի 3-րդ մասի 1-ին կետով ու դատապարտել 4 տարվա ազատազրկման, իսկ վաշխառության հոդվածը՝ ՀՀ քրեական օրենսգրքի 213-րդ հոդվածի 2-րդ մասի 1-ին կետով վերաորակել էր նույն հոդվածի 1-ին կետով և այդ հոդվածով նշանակված 1 տարվա ազատազրկման պատժից ազատել՝ ՀՀ անկախության 20-ամյակի առթիվ ընդունված համաներման մասին որոշման կիրառմամբ:

Գործով դատավարական հսկողություն իրականացնող դատախազ Սամվել Հարությունյանն իր մեղադրական ճառում հիմնավորված էր համարել առանձնապես խոշոր չափերի խարդախության և տուժողին ծանր կացության հասցրած վաշխառության՝ ամբաստանյալ Սամսոն Ղազարյանին ներկայացված մեղադրանքը: Այն, ըստ մեղադրողի, ապացուցված է գործի փաստական ապացույցներով՝ տուժողի, վկաների ցուցմունքներով, նաև նախաքննության գրեթե ավարտական փուլում ամբաստանյալի մասնակի խոստովանական ցուցմունքով:

Ս. Հարությունյանը հաստատված էր համարել, որ տուժող, նույնպես նախկին պատգամավոր Մեխակ Գաբրիելյանը Ս. Ղազարյանից պարտքով վերցրած գումարի դիմաց պարտաճանաչ վճարել է 3.5-5-10 տոկոս, ինչպես նաև մարել պարտքի մայր գումարը: «Եվ այս ամենից հետո Սամսոն Ղազարյանի մոտ մնացել է ցանկություն մի փոքր էլ ավելին ստանալ՝ 10 հազար ԱՄՆ դոլար, սակայն չհասնելով իր նպատակին, այսինքն՝ չստանալով հավելյալ 10 հազար ԱՄՆ դոլարը, ամբաստանյալը մեղմ ասած՝ զայրացել է և հավանաբար այս պատճառով, չմտածելով հետևանքների մասին, իր մոտ պահած, ըստ էության ոչնչացման ենթակա ստացականը ներկայացրել է դատարան և պահանջել ոչ ավել, ոչ պակաս՝ 60 հազար ԱՄՆ դոլար և իրավունք է ձեռք բերել տուժողի գույքի նկատմամբ»,- ասաց մեղադրողը, հավելելով՝ ամբաստանյալը կատարել է հափշտակություն խարդախության եղանակով:

Ս. Հարությունյանն ընդգծել էր, որ վկաները միաբերան հաստատել են, որ Ս. Ղազարյանը տոկոսով գումար է տվել և ամբողջությամբ ստացել մայր գումարն ու տոկոսները, ընդ որում, վճարված տոկոսների գումարը գերազանցել է մայր գումարը:

Ըստ մեղադրողի՝ Սամսոն Ղազարյանը կատարել է ծանր և միջին ծանրության հանցագործություններ, որոնք «վերջին շրջանում լայն տարածում են ստացել մեր կյանքում» և հասարակական վտանգավորություն են ներկայացնում, ուստի միջնորդել էր ամբաստանյալին դատապարտել 5 տարվա ազատազրկման:

Պաշտպանական կողմը, հակառակը, գտնում էր, որ մեղադրանքն անհիմն է, ուստի միջնորդել էր կայացնել արդարացման դատավճիռ: Ամբաստանյալն իր վերջին խոսքում հայտարարել էր, որ նախաքննությունն անց է կացվել միակողմանի, խոչընդոտվել է իր պաշտպանվելու հնարավորությունները, նախաքննական ցուցմունքներ տվել է իր նախաձեռնությամբ, իսկ նախաքննության ավարտվելու որոշման դեմ իր բողոքը մերժվել է ՀՀ Սահմանադրության ու Պարույր Հայրիկյանի ծննդյան օրը և գործը «հապճեպ ուղարկվել է դատարան»: