Փաստ ինֆո

Կոնդ թաղամասում խուլիգանական դրդումներով կատարված սպանության գործով ամբաստանյալ Հարություն Թանապուրյանի պաշտպան Ավագ Լալայանն այսօր դատական նիստին չէր ներկայացել «անձնական պատճառներից ելնելով»։ Վերջինս դատարանին հասցեագրված դիմումում այդպես էր բացատրել իր դատարան չներկայանալու պատճառը և որ անհետաձգելի անձնական գործերի պատճառով չի կարող ներկայանալ դատական նիստին՝ խնդրելով նիստը հետաձգել:

Դատարանը հարկ համարեց պարզաբանել, որ դատավարության ոչ մի մասնակից չի կարող իր անձնական պատճառներից ելնելով դատական նիստերին չներկայանալ, քանի որ այդ հանգամանքը կարող է դիտարկվել անհարգալից վերաբերմունք դատարանի նկատմամբ, ինչը կարող է ավարտվել պաշտպանի նկատմամբ սանկցիայի կիրառմամբ:

Նշենք, որ այսօրվա դատական նիստում պետք է լսվեր ամբաստանյալների պաշտպանների ճառը, այդ իսկ պատճառով դատարանը դիմեց ամբաստանյալ Հարություն Թանապուրյանին հարցով, արդյո՞ք վերջինս չի առարկում, որ մյուս ամբաստանյալ Հարություն Մկրտչյանի պաշտպան Յուրիկ Խաչատրյանը հանդես գա ճառով, իսկ դատարանն այդ ամբողջ ձայնագրությունը կտրամադրի Թանապուրյանի պաշտպանին՝ իր գործընկերոջ ճառը լսելու համար: Ամբաստանյալն առարկեց առանց իր պաշտպանի դատական նիստը շարունակելու կապակցությամբ:

Դատարանն ամբաստանյալ Հարություն Մկրտչյանի պաշտպան Յուրիկ Խաչատրյանին խնդրեց փոխանցել պաշտպան Ավագ Լալայանին , որ վերջինս դատարանին պատշաճ տեղեկատվություն ներկայացնի այդ անձնական գործի վերաբերյալ, հակառակ դեպքում նրա նկատմամբ կկիրառվի սանկցիա: Ինչպես նաև դատարանը հարկ համարեց ամբաստանյալ Թանապուրյանին տեղեկացնել, որ դատական նիստերը չեն կարող հետաձգվել պաշտպանի բացակայության պատճառով և որ վերջինս մտածի մեկ այլ պաշտպան ունենալու մասին կամ դիմի հանրային պաշտպանի պահանջով:

Այնուամենայնիվ դատական նիստը հետաձգվեց և նշանակվեց ապրիլի 4-ին:

Հիշեցնենք, որ նախորդ դատական նիստին մեղադրող դատախազ Հայկ Էյրամջյանը միջնորդել էր հիմնական ամբաստանյալ Հարություն Թանապուրյանին հանցավոր ճանաչել և դատապարտել 19 տարվա ազատազրկման, իսկ գործով մյուս ամբաստանյալ Հարություն Մկրտչյանին դատապարտել 4,5 տարվա ազատազրկման: Միաժամանակ մեղադրողը միջնորդեց ամբաստանյալ Հարություն Մկրտչյանի նկատմամբ ընտրված խափանման միջոց ստորագրությունը փոփոխել կալանավորման և նրան արգելանքի վերցնել դատական նիստերի դահլիճից:

Հարություն Թանապուրյանը մեղադրվում է 2012թ. հունվարի լույս 4-ի գիշերը, ժամը 01.00-ի սահմաններում Հարություն Մկրտչյանի հետ Կոնդ թաղամասում դանակի գործադրմամբ խուլիգանություն կատարելու մեջ, որի ընթացքում խուլիգանական դրդումներով Մերուժան Մինասյանին դիտավորությամբ ապօրինաբար զրկել է կյանքից: Իսկ Հարություն Մկրտչյանին մեղադրանք է առաջադրվել նույն օրը ժամը 01.00-ի սահմաններում Հարություն Թանապուրյանի հետ Կոնդ թաղամասում դանակի գործադրմամբ խուլիգանություն կատարելու համար: