Փաստ ինֆո

Մարտի 27-ին` առավոտյան ժամը 06:30-ի սահմաններում, գլխի տարբեր վնասվածքներով և անգիտակից վիճակում Կապանի բժշկական կենտրոն էր տեղափոխվել Կապանի բնակիչ 43-ամյա Արմեն Վարդանյանը: Ըստ տարածված տեղեկությունների` նրան ծեծի էր ենթարկել Սյունիքի մարզպետ Սուրեն Խաչատրյանի թիկնապահ Զարզանդ Նիկողոսյանը: Այս մասին գրում է թերթը և հավելում, որ ըստ լուրերի` ծեծկռտուքի պատճառը եղել է գիշերային ակումբի մոտ մի քանի խմած տղաների կողմից Զարզանդին ծաղրելը:

Թերթի թղթակիցը զրուցել է Զարզանդ Նիկողոսյանի հետ` պարզելու, թե ինչն է եղել ծեծկռտուքի պատճառը:

Վերջինս մասնավորապես ասել է, որ ոչ մի միջադեպ չի եղել, մարդը խմած դուրս է եկել և աստիճաններից գլորվել, ինքն օգնել է ընկածին, նստեցրել մեքենան և ուղարկել:

Զ.Նիկողոսյանը նշել է, որ ոստիկանություն ներկայացել է ինքնակամ, բացատրություններ գրել կատարվածի մասին: Նրա խոսքերով` ինքը ոստիկանությունում մնացել է ընդամենը 30 րոպե:

Հարցին, թե ճիշտ է արդյոք, որ նրա անվան հետ կապված ծաղրել են նրան, Զ.Նիկողոսյանը պատասխանել է. «Չէ, չէ, ցավդ տանեմ, ոչ մի միջադեպ էլ տեղի չի ունեցել, ոչ մեկն էլ ինձ չի կարա ձեռ առնի: Բոլորն էլ ինձ ճանաչում են, մի քաղաքի մարդիկ ենք, ո՞նց կարան ինձ չճանաչեն ու ձեռ առնեն»:

Թերթը հիշեցնում է, որ Սյունիքի մարզպետարանը հաղորդագրություն էր տարածել, ըստ որի` Սյունիքի մարզպետ Սուրեն Խաչատրյանը թիկնապահ չունի և չի ունեցել, իսկ նման դեպքը Ս.Խաչատրյանի անվան հետ կապելը տեղին չէ: