Փաստ ինֆո

Մալաթիայի նախկին թաղապետի որդու՝ Սեդրակ Զատիկյանի սպանության պատվիրատուի մասով այսօրվա դատական նիստում պաշտպանական կողմը հայտարարեց, որ ըստ ամենայնի հաջորդ դատական նիստին կներկայացնի փաստեր նախաքննության ընթացքում քննության խորթ մեթոդների կիրառման մասին:

Սպանության պատվեր տալու մեջ մեղադրվող Ստեփան Հակոբյանի պաշտպան Երեմ Սարգսյանը հիշեցրեց նաև, որ նախաքննական մարմնի կողմից խոշտանգումների ու վատ վերաբերմունքի մասին դատարանում (գործը քննվում է Երևանի Մալաթիա-Սեբաստիա վարչական շրջանի դատարանում՝ դատավոր Տիգրան Պետրոսյանի նախագահությամբ) հայտարարություններ են արել գործով վկաներ Ահարոն Հակոբյանը, Արամայիս Սեդրակյանն ու բուն սպանության գործով դատապարտյալ Արթուր Հովհաննիսյանը, դատարանն այդ հայտարարությունների կապակցությամբ դիմել է Հատուկ քննչական ծառայությանը, սակայն դեռևս պատասխան չի ստացել: Իսկ տուժող Սեդրակ Զատիկյանի իրավահաջորդի ներկայացուցիչ Վաղարշակ Գևորգյանը հայտարարեց, որ անհրաժեշտ է միջոցներ ձեռնարկել, որպեսզի ՀՔԾ-ն տեղյակ պահի դատավարության կողմերին մինչև այժմ ինչ է արվել հիշյալ հայտարարությունների առնչությամբ և երբ է ավարտվում հայտարարություններն ուսումնասիրելու և եզրահանգման հանգելու ողջամիտ ժամկետը:

Այսօրվա դատական նիստում ցուցմունքներ տվեց գործով վկա, Ստեփան Հակոբյանի ընկեր Արմեն Բեկջանյանը և հայտարարեց, որ սպանության օրը՝ 2006թ. հունիսի 22-ին իրեն զանգահարել է իր և Ստեփան Հակոբյանի ընդհանուր ընկեր Նարեկ Խաչատրյանը (նա հետախուզվում է սպանության պատվեր տալու մեղադրանքով ) և խնդրել Ս.Հակոբյանի ամառանոց գալու ճանապարհին վերցնել մեքենայի մաքսազերծման փաստաթղթերը՝ Նարեկ Խաչատրյանը զբաղվում էր արտերկրից մեքենաներ ներկրելով: Ա.Բեկջանյանին այդ փաստաթղթերը փոխանցել են, իսկ վկա Ահարոն Հակոբյանն իր հերթին դրանք փոխանցել է մի երրորդ անձի (ըստ նախաքննական մարմնի, իրականում երրորդ անձին գումար է փոխանցվել՝ սպանության դիմաց): Վկան հայտարարեց, որ ինքը փաթեթից ներս չի նայել, ուստի պարունակությունը չի տեսել:

Ա.Բեկջանյանը հայտնեց նաև, որ նույն օրը ամառանոցում ճաշելուց հետո Ստեփան Հակոբյանը հայտնել է, որ սպանված Ս.Զատիկյանի հարազատներն իրեն են վերագրում սպանությունը, հայտարարություններ անում՝ «չի լուսացնի», ուստի ինքը նպատակ ունի քաղաքից առժամանակ հեռանալ՝ մինչև նրանք հանդարտվեն:

Վկան պնդեց իր նախաքննական ցուցմունքները՝ հայտարարելով, որ ցուցմունքներ է տվել իր փաստաբանի ներկայությամբ և որ իր հարցաքննության ժամանակ «ամեն ինչ նորմալ է եղել»:

Հատկանշական է, որ դեռևս 2007թ. վկա Ահարոն Հակոբյանը նախաքննական մարմնին ցուցմունք է տվել և հայտնել, որ ինքը Արմեն Բեկջանյանի հետ գումար է փոխանցել, ըստ ամենայնի Արմեն Բեկջանյանը պետք է, որ նախաքննական մարմնի կողմից կարևոր վկա համարվեր, սակայն վերջինս հարցաքննվել է միայն 2012թ.: