Փաստ ինֆո

Արաբկիր և Քանաքեռ-Զեյթուն վարչական շրջանի դատարանում՝ Արմեն Խաչատրյանի նախագահությամբ, այսօր քաղաքագետ Սուրեն Սուրենյանցի նկատմամբ հետախուզումը դադարեցվեց և քրեական գործը կարճվեց:

Մինչ այդ, մեղադրողը փոփոխեց Սուրեն Սուրենյանցին ՀՀ քրեական օրենսգքրի 178-րդ հոդվածի 2-րդ մասի 2-րդ կետով առաջադրված մեղադրանքը` նրան առաջադրելով նոր մեղադրանք` նախատեսված ՀՀ քրեական օրենսգրքի 178-րդ հոդվածի 1-ին մասով (2 դրվագ):

ՀՀ ԿԱ ոստիկանության Արաբկիրի քննչական բաժնում քննված քրեական գործի շրջանակներում Ս.Սուրենյանցին մեղադրանք էր առաջադրվել` 2011թ. մայիս-օգոստոս ամիսներին խարդախությամբ ուրիշի գույքը հափշտակելու դիտավորությամբ, իր ծանոթ Գ.Ղասաբյանի վստահությունը չարաշահելու միջոցով, վերջինիս դստերը աշխատանքի տեղավորելու, լրագրողական դասընթացների համար Ֆրանսիա ուղարկելու պատրվակով, ինչպես նաև բիզնեսով զբաղվելու համար ընդհանուր 508 000 դրամ գումար վերցնելու եւ դրան խարդախությամբ տիրանալու համար:

Մեղադրանքը պաշտպանող դատախազի գնահատմամբ` ակնհայտ է, որ Ս.Սուրենյանցը 2011թ. մայիսին Գ.Ղասաբյանից բիզնես կազմակերպելու պատրվակով խաբեությամբ հափշտակել է 1000 ԱՄՆ դոլար, այնուհետև նույն թվականի օգոստոս ամսին նույն Ղասաբյանից խաբեությամբ հափշտակել է 110 000 ՀՀ դրամ և 71 եվրո գումար` վերջինիս դստերն աշխատանքի տեղավորելու պատրվակով:

Այսպիսով` ըստ դատախազի` Ս. Սուրենյանցի վերոհիշյալ գործողությունները կատարվել են առանձին դիտավորությամբ: Այսինքն` Ս. Սուրենյանցը կատարել է հանցավոր արարքներ` նախատեսված ՀՀ քրեական օրենսգրքի 178-րդ հոդվածի 1-ին մասով(2 դրվագ):

Գործի կարճելը դատարանը հիմնավորեց նրանով, որ Սուրենյանցը և տուժողը միմյանց հետ խնդիրներ չունեն և հաշտվել են, իսկ դատաքննության ընթացքում Սուրենյանցը տուժող Գրիգոր Ղասաբյանից վերցրած 508.000 դրամ գումարը հետ է վերադարձրել:

Սուրենյանցը իր խոսքում ընդգծեց, որ ի սկզբանե դիտավորություն չի եղել հափշտակություն կատարելու և որ տուժող Ղասաբյանից այդ գումարը պարտքով է վերցրել:

Լուսանկարն՝ Արմենպրեսի