Փաստ ինֆո

Սյունիք գյուղում գտնվող գիշերային ակումբում տեղի ունեցած միջադեպի կապակցությամբ ոստիկանությունն այսօր բերման է ենթարկել Զարզանդ Ն.-ին և Դավիթ Բ.-ին, ովքեր, ըստ ոստիկանության տվել են ինքնախոստովանական բացատրություն և ստորագրությամբ բաց են թողնվել:

Նյութերի նախապատրաստման ընթացքում, ոստիկանության կայքէջի հաղորդմամբ, պարզվել է, որ ակումբի աստիճանահարթակի մոտ տեղի ունեցած ծեծկռտուքի ժամանակ Զարզանդ Ն.-ն մարմնական վնասվածք է պատճառել նաև Արմեն Վ.-ի ընկերոջը` Դավիթ. Ա.-ին: Նշանակվել են դատաբժշկական փորձաքննություններ:

Նշենք, որ այսօր Զարզանդ Ն.-ն, նույն ինքը Զարզանդ Նիկողոսյանը հերքել էր վիճաբանությանը մասնակից լինելու հանգամանքը։ Մասնավորապես նա NEWS.am-ի թղթակցին վերահաստատել է, որ երեկ՝ մարտի 26-ին, ինքն իր ընկեր` Դավիթ Բ.-ի հետ, այցելել է Սյունիք գյուղում գտնվող գիշերային ակումբ, սակայն նշել, որ որևէ վիճաբանության, ծեծկռտուքի չի մասնակցել:

«Վիճաբանություն չի եղել, ո՞վ է ասում, որ վիճաբանություն է եղել, մի հոգի խմած ա եղել, աստիճաններից գլորվել է, ընկել, գլուխը խփել է ասֆալտին, անունը չգիտեմ էլ ինչ է, չեմ էլ ճանաչում»,- թղթակցին ասել է Զարզանդ Նիկողոսյանը:

Հիշեցնենք, որ մարտի 26-ին, ժամը 06.45-ին, հիվանդանոցից ոստիկանության Կապանի բաժնում ահազանգ է ստացվել, որ մարմնական վնասվածքներով և ալկոհոլային հարբածությամբ իրենց մոտ է տեղափոխվել 1970 թ. ծնված Արմեն Վ.-ն: Նրան ուղեկցող տղամարդու բացատրությամբ` Արմեն Վ.-ն վնասվածքը ստացել է նույն օրը, ժամը 05.30-ի սահմաններում, Սյունիք գյուղում գտնվող գիշերային ակումբի աստիճանահարթակից վայր ընկնելու հետևանքով:

Ձեռնարկված միջոցառումների շնորհիվ պարզվել է, որ Արմեն Վ.-ին նշված ակումբի աստիճանահարթակի մոտ մարմնական վնասվածքները հասցրել են 1970 թ. ծնված Զարզանդ Ն.-ն և 1976 թ. ծնված Դավիթ Բ.-ն: