Փաստ ինֆո

Լոռու մարզի ընդհանուր իրավասության առաջին ատյանի դատարանում շարունակվում է Արթուր, Մացակ և Արմեն Բադալյան եղբայրների` խուլիգանության գործով դատավարությունը: Այս մասին գրում է թերթը և հիշեցնում, որ ըստ մեղադրանքի` Բադալյան եղբայրները Հարթագյուղ համայնքում վիճաբանել էին մի քանի անձանց հետ, հայհոյել: Վիճաբանության ժամանակ Գյումրի քաղաքի բնակիչ Արմեն Մկրտչյանը ստացել էր հրազենային վնասվածք:

Դատարանում մեղադրանքը պաշտպանում է Տավուշի մարզի դատախազության դատախազ Ա.Ազիզբեկյանը:

Ներկայումս դատը վիճաբանությունների փուլում է: Սակայն պաշտպանները միջնորդություն են ներկայացրել դատարան, որով միտում ունեին վերսկսելու դատը:

Հիշյալ միջնորդությանը կցված են եղել մարդու իրավունքների պաշտպանի` բողոքի քննարկումը դադարեցնելու մասին որոշումը, Հելսինկյան քաղաքացիական ասամբլեայի գրությունը` ուղղված ՀՀ գլխավոր դատախազին, նաև վկայի ցուցմունքը:

ՀՀ գլխավոր դատախազին ՀՔԱ Վանաձորի գրասենյակի կողմից ուղարկված գրության մեջ մասնավորապես ասվում է. «Հարթագյուղի բնակիչներ Գոհար և Գայանե Բաղդասարյանները հայտնեցին այն մասին, որ ոստիկանության աշխատակիցները մի քանի անգամ եկել են իրենց տուն, մեկ անգամ էլ նրանց տարել են գյուղապետարան և ստիպել, որ գրեն, թե իրենք տեսել են գյուղում տեղի ունեցած վիճաբանությունը»:

Գոհար և Գայանե Բաղդասարյանները մասնավորապես հայտնել են, որ ոստիկանության աշխատակիցներն իրենց սպառնացել են ու վիրավորել ասելով. «Էս գողականությունից էլ ե՞ք հասկանում, կտանենք ձեռքներիդ նակոլկեք կխփենք, տանելու եմ տոկի քցեմ, որ ճիշտն ասես»:

«Նշված գրության մեջ ասվում է նաև ոստիկանության աշխատակիցների կողմից թույլ տրված այլ խախտումների մասին ևս: Փաստաբաններ Ա.Ոսկանյանը և Ռ.Հակոբյանը պահանջել են, որ Գոհար և Գայանե Բաղդասարյանները և նրանց մայրը` Ն.Հարությունյանը, որպես վկա կանչվեն դատարան: Փաստաբանների կողմից միջնորդություն է արվել նաև, որ դատարանը վերսկսի դատաքննությունը»,- գրում է թերթը: