Փաստ ինֆո

Թերթն անդրադարձել է «Երևանի Վ.Բրյուսովի անվան լեզվաբանական համալսարանի» նախկին ռեկտոր Ս.Զոլյանի` ԱԱԾ կանչվելուն և հավելում, որ ըստ թերթի տեղեկությունների` նա ԱԱԾ-ի ուշադրության կենտրոնում է հայտնվել իր կասկածելի գործունեության հանգամանքով պայմանավորված:

Թղթակիցը փորձել է զրուցել Զոլյանի հետ, ով սակայն այնպես է նյարդայնացել, որ անգամ հարցը մինչև վերջ չի լսել:

«Ս.Զոլյանի պահվածքը մատնեց նախկին ռեկտորին, և մենք համոզվեցինք, որ շրջանառվող լուրերն իսկապես իրականության հետ աղերսներ ունեն: Ուստի` առաջ անցանք` փորձելով հասկանալ, թե գնումների չարաշահումների մասին ի՞նչ գիտի ՀՀ վերահսկիչ պալատը և հնարավո՞ր է, որ նրանց բացահայտումներն են հիմք հանդիսացել ԱԱԾ-ի համար»,- գրում է թերթը: Թերթի թղթակցին, սակայն, Վերահսկիչ պալատից պատասխանել են, որ իրենք նշված համալսարանում ստուգումներ չեն իրականացրել:

Սակայն համացանցում որոնման արդյուքներով թղթակիցը պարզել է, որ դեռևս նախորդ տարի ՀՀ կրթության և գիտության նախարարության մամուլի ծառայությունը հաղորդագրություն է տարածել, ըստ որի` «Երևանի Վ.Բրյուսովի անվան պետական լեզվաբանական համալսարանում» իրականացված վերահսկողության ընթացքում, բացահայտվել և արձանագրվել են համալսարանի ռեկտորի կողմից կատարված մի շարք խախտումներ, որոնք առնչվում են համալսարանի կրթական գործունեության մի շարք ուղղություններին: