Փաստ ինֆո

Թերթն անդրադարձել է մարտի 23-ին Ավան-Առինջում հնչած կրակոցների դեպքին: Դրանք ուղղված են եղել Տավուշի մարզի Բերդ քաղաքի քաղաքապետ Հարություն Մանուչարյանի որդուն և քրոջ տղային:

Անուշավան Մանուչարյանը նաև ԱԺ ՀՀԿ խմբակցության նախկին քարտուղար Գագիկ Մելիքյանի փեսան է:

Որոշ մանրամասներ պարզելու համար թերթի թղթակիցն այցելել է Ավան-Առինջ` դեպքի վայր: Թաղամասի բնակիչներից մեկը կրակոցների հնչելու ժամանակ նկատել է, թե ինչպես իրենց պատուհանի դիմացով մի երիտասարդ է վազում:

«Փախչողը սև շորերով մի տղա էր ու վազեց կանգնեց. միգուցե ինչ-որ բան էր ընկել, նաև նկատեցի, որ ոտքը բռնած էր»,- պատմել է նշված տարածքի բնակիչներից Արմինեն:

Թերթի թղթակիցը տեղեկացել է, որ երիտասարդներից մեկը` Արմեն Սիմոնյանը, ով Բերդի քաղաքապետ Հարություն Մանուչարյանի քրոջ տղան է, կրակոցների հետևանքով գոտկատեղի հատվածում վնասվածք է ստացել և այժմ գտնվում է «Սուրբ Գրիգոր Լուսավորիչ» բժշկական կենտրոնում:

Նրա հետ եղել է Հ.Մանուչարյանի որդին` Անուշավան Մանուչարյանը, ով փախել է, և կրակողներից մեկը հետապնդել է նրան մինչև այն պահը, երբ նա մտել է իր բնակության վայրի շքամուտք:

Թղթակիցն այցելել է հիվանդանոց և խոսել հրազենային վնասվածք ստացած Արմենի հետ, ով մասնավորապես ասել է. «Դժվար էլ փորձեք հասկանալ, թե ինչ է կատարվում: Ինձ նայեք, բա ես թշնամիներ ունեցող մարդու տեսք ունե՞մ: Ոչ, թշնամիներ չունեմ»,- ասել է Արմենը`չցանկանալով շարունակել զրույցը:

Ոստիկանության հասարակայնության հետ կապերի և լրատվության վարչությունից թերթին հայտնել են, որ մարտի 24-ին` ժամը 02:30-ին, Երևան քաղաքի Քանաքեռ-Զեյթուն վարչական շրջանի բնակիչներ 25-ամյա Բեգլար Հովհաննիսյանը և 30-ամյա Հրանտ Հարությունյանը ներկայացել են ոստիկանություն և ներկայացրել հանցագործության գործիք «Մակարով» ատրճանակը առանց փամփուշտների, և «Մարգուլին» ատրճանակը` պահունակով` լիցքավորված 1 փամփուշտով: Նրանք ձերբակալված են, ատրճանակներն ուղարկվել են փորձաքննության: Կատարվում է նախաքննություն: