Փաստ ինֆո

ՀՀ նախագահի փետրվարի 18-ի ընտրություններից առաջ իրականացված դիտարկման արդյունքների համաձայն` Երևանի բոլոր ընտրատեղամասերից թեքահարթակով ապահովված և լիովին մատչելի էին միայն 31-ը (6%), իսկ մասամբ մատչելի` 44-ը (9%): Այս մասին մարտի 26-ին «Մեդիա կենտրոնում» կայացած «Հաշմանդամություն ունեցող անձանց խնդիրները, առաջարկություններ Երևանի ավագանու ընտրություններին ընդառաջ» թեմայով քննարկում-ասուլիսի ժամանակ հայտնել է «Ունիսոն» ՀԿ նախագահ Արմեն Ալավերդյանը:

«Իրականում սա բավական փոքր տոկոս է, և քաղաքապետարան ենք ներկայացրել ընտրատեղամասերը հարմարավետ դարձնելու վերաբերյալ մեր առաջարկները: Կարծում ենք, որ մինչ Երևանի ավագանու ընտրություններն  այդ փոփոխություններն իրականացնելը լիովին հնարավոր է»,- ընդգծել է Ա. Ալավերդյանը:

«Հարմոնիա» ՀԿ նախագահ Ալբերտ Աբգարյանն էլ շեշտել է, որ դեռևս նախորդ խորհրդարանական ընտրություններից ի վեր Կենտրոնական ընտրական հանձնաժողովը բավարարել է տեսողական խնդիրներ ունեցողների ընտրական իրավունքի իրացման հնարավորությունը՝ տեղադրելով բրալյան համակարգով ստվարաթղթե կաղապարներ և խոշորացույցեր: Ըստ նրա, դրանք լայնորեն կիրառվել են. «Ինքս օգտվել եմ այդ կաղապարից, ինքնուրույն քվեարկել և պահպանել գաղտնիությունը»,- ասել է նա:

«Աշխարհն առանց արգելքների» ՀԿ նախագահ Արման Մուշեղյանի հավաստմամբ` վերջին մի քանի տարիներին պետական այրերի հետ հանդիպումներն ու համագործակցությունն առավել արդյունավետ են դարձել, բայց հիմնականում դրանք կրում են ձևական բնույթ. «Երբ հաշմանդամություն չունեցող մարդիկ են որոշումներ կայացնում, ապա հակված են մոռանալու դրանց մասին, իսկ մեր երկրում հիմնականում նրանք են որոշումներ կայացնում»:

«Մենք ամեն անգամ լավ խոստումներ ենք լսում, բայց գտնվում են դրանք շրջանցելու տարբերակներ»,- դժգոհել է Ա.Մուշեղյանը` փաստելով, որ մեկ տարի առաջ, երբ Երևան էին ներկրվում  նոր ավտոբուսներ, խոստումներ էին հնչել` դրանք հարմարեցնելու կամ ներկրելու արդեն իսկ հաշմանդամների համար նախատեսված հարմարություններով, «սակայն դա տարբեր պատճառաբանություններով կրկին չարվեց»:

Բանախոսները նշել են, որ չնայած Հայաստանը վավերացրել է Հաշմանդամություն ունեցող անձանց իրավունքների մասին կոնվենցիան, օրենսդրական դաշտում պաշտպանված են նրանց իրավունքները, սակայն օրենքները հիմնականում դեռ թղթի վրա են և բազում հիմնախնդիրների պատճառով Երևանում ապրող հաշմանդամություն ունեցող մոտ 60 հազար մարդ ազատորեն չի կարող տեղաշարժվել:

Քննարկման մասնակիցները հույս են հայտնել, որ Երևան քաղաքի նոր ավագանու հետ համագործակցությունը կլինի առավել սերտ` նպաստելով հաշմանդամների իրավունքների պաշտպանությանը: