Փաստ ինֆո

2013 թվականի մարտի 22-ին ԱԺ տարածք ապօրինի մուտք գործած Վրեժ Գալստյանը մոտ մեկ տարի առաջ բուժվել է հոգեբուժարանում։ ՀՀ գլխավոր դատախազի խորհրդական Սոնա Տռուզյանի փոխանցմամբ, այս մասին հայտնել է Վ.Գալստյանի մայրը՝ հարցաքննության ժամանակ և նախաքննական մարմինը համապատասխան գերատեսչությունից պահանջել է նրա հոգեկան վիճակի վերաբերյալ փաստաթղթերը։

Հիշեցնենք, որ 2013 թվականի մարտի 22-ին՝ ժամը 14։50-ի սահմաններում, Մասիս քաղաքի բնակիչ Վրեժ Գալստյանը, չենթարկվելով անվտանգության ծառայության ծառայողների օրինական պահանջներին, դիմադրություն է ցույց տվել և ապօրինի մուտք գործել ՀՀ Ազգային ժողովի տարածք, ապա դանակ գործադրելու սպառնալիքով փորձել է մուտք գործել նաև ԱԺ վարչական շենք։

Նա չի ենթարկվել անվտանգության աշխատակիցների օրինական պահանջներին և իր ապօրինի գործողությունները չի դադարեցրել նաև նախազգուշական կրակոցից հետո։ Ուստիև քաղաքացու տեղաշարժը կանխելու եւ նրան վնասազերծելու նպատակով անվտանգության աշխատակիցը հրազենից կրակոց է արձակել վերջինիս ուղղությամբ գոտկատեղից ներքև՝ ձախ ազդրի վերին երրորդականի շրջանում պատճառելով միջանցիկ հրազենային մարմնական վնասվածք։ Դանակն առգրավվել է, իսկ քաղաքացին տեղափոխվել հիվանդանոց: Դեպքի առթիվ ՀՀ հատուկ քննչական ծառայությունում հարուցվել է քրեական գործ՝ ՀՀ քրեական օրենսգրքի 316-րդ հոդվածի հատկանիշներով։

Ս.Տռուզյանի փոխանցմամբ, հարուցված գործի շրջանակներում նշանակվել են դատաբժշկական, դատաձեռագրաբանական փորձաքննություններ, հարցաքննվել են ականատեսները, ԱԺ մուտքի մոտ ծառայություն իրականացնող անվտանգության աշխատակիցները, Վ.Գալստյանի մայրը։