Փաստ ինֆո

Ֆրանսիական դատարանը նախնական մեղադրանքները միացրել է երկրի նախկին նախագահ Նիկոլա Սարկոզիի դեմ հարուցված գործին ՝ կապված նրա նախընտրական գործընթացին առնչվող ենթադրվող անօրինական ֆինանսավորման հետ: Այսպիսով, Սարկոզին պաշտոնապես մեղադրվում Է Ֆրանսիայի ամենահարուստ կնոջից և «Լ՛Օրեալ» կայսրության ժառանգորդից՝ Լիլիան Բետանկուրից անլեգալ նվիրատվություններ ստանալու մեջ և գտնվում է քննության տակ, հղում անելով «Associated Press»-ին հաղորդում է «pravo.ru» կայքը:

58-ամյա Սարկոզիի դեմ մեղադրանքները առաջադրվել են Բորդո քաղաքի դատարանում բազմաժամյա հարցաքննություններից հետո: Նախկին նախագահի դեմ հարուցվել է «իր իրավասությունները գերազանցել է թույլ առողջություն ունեցող անձին դիմելիս» մեղադրանք: Անձ ասելով ենթադրվում է 90-ամյա տիկին Բետանկուրը: Ֆրանսիական օրենսդրության համաձայն՝ նախնական մեղադրանքների հրապարակումը նշանակում է, որ քննիչն ունի հիմքեր ենթադրելու, որ թույլ են տրվել օրինախախտումներ կամ հանցագործություններ և նրան քննության համար ավելի շատ ժամանակ է ընձեռվում: Այդ մեղադրանքները հետագայում կարող են հանվել կամ, հակառակ պարագայում, հանգեցնել դատական քննության:

Կարելի է ենթադրել, որ Սարկոզին կարող է միանալ իր նախորդին և ուսուցչին՝ Ֆրանսիայի նախկին նախագահ Ժակ Շիրակին, ով խառնված է եղել ֆինանսաքաղաքական աղմկահարույց մի գործի և դատապարտվել այն բանից հետո, երբ թողեց իր պաշտոնը: 2011թ.-ին Շիրակը, սկսած երկրորդ համաշխարհային պատերազմի ժամանակներից, դարձավ միակ նախկին նախագահը, ով հայտնվեց մեղադրյալի աթոռին: Մինչ այդ մարշալ Ֆիլիպ Պետենը դատապարտվել էր կատարած հանցագործությունների համար (գերմանական նացիստների հետ համագործակցության համար) և արժանացել մահապատժի: Նշենք, որ ավելի ուշ Շարլ դ՛ Գոլը այդ դատավճիռը փոխեց ցմահ բանտարկությամբ:

Սարկոզիի գործը շեղեց շատերի ուշադրությունն այսօր ֆրանսիական կառավարությունում սկսված մեկ այլ քաղաքական աղմուկից՝ կապված երկրի ֆինանսների նախարար Ջերոմ Կայուզակի պաշտոնաթողության հետ, ով մեղադրվում է հայրենիքում հարկերը մուծելուց խուսափելու համար սեփական ֆինանսական միջոցներն արտասահման տեղափոխելու մեջ:

Բորդոյի հետաքննությունը կապված է մադամ Բետանկուրի ֆինանսների հետ: Այն արդեն մեկ անգամ եղել է ուշադրության կենտրոնում՝ կապված այդ հարստության համար ընտանիքում ծագած երկարատև թշնամանքի հետ: Ալցհեյմերի հիվանդությամբ տառապող մադամ Բետանկուրի հարստությունը այժմ գտնվում է պետության իրավական խնամակալության տակ:

Սարկոզին, կապված նախագահական ժամկետի ավարտի հետ, կորցրել է քրեական պատասխանատվության ենթարկվելու հանդեպ իր իրավաբանական իմունիտետը: Նոյեմբերին նա ստացավ հետագայում խարդախության, վստահությունը չարաշահելու, իր իրավասությունները թույլ առողջություն ունեցող անձին դիմելիս գերազանցելու մեղադրանքը պահպանելու հավանականությամբ վկայի կարգավիճակ: Լիլիան Բետանկուրի նախկին հաշվապահի խոսքերով նա 192 հազար դոլար է փոխանցել Սարկոզիի գանձապահներին: