Փաստ ինֆո

ՀՀ վերաքննիչ քրեական դատարանում ավարտվել է շարքային զինծառայող Սամվել Խաչատրյանին ինքնասպանության հասցնելու գործով բերված վերաքննիչ բողոքի քննությունը:

Սյունիքի մարզի ընդհանուր իրավասության առաջին ատյանի դատարանը 2012թ. դեկտեմբերի 27-ի դատավճռով զինվորին ինքնասպանության հասցնելու համար մեղավոր էր ճանաչել դասակի հրամանատար, լեյտենանտ Ռաֆայել Մկրտչյանին, ջոկի հրամանատարներ, կոչումով կրտսեր սերժանտներ Տարոն Համբարձումյանին, Աշոտ Սարգսյանին, Արթուր Հովհաննիսյանին, ջոկի ավագ հրաձիգ, եֆրեյտոր Դավիթ Ղազարյանին, ջոկի վարորդ, շարքային Գևորգ Հարությունյանին, ջոկի հրաձիգ, շարքային Ծովակ Բարսեղյանին:

«Զիվորին հետապնդելու և ծեծի ենթարկելու առիթը չնչին է եղել: 2010թ. հոկտեմբերի 2-ին Ծովակը նկատել է, որ Սամվելը ձեռքերը լվանում է զորամասի ճաշարանում գտնվող լվացարանում` սպասքի վրա: Նա հայհոյել է, որին պատասխանել է նաև Սամվելը, ապա վերջինս հրաժարվել համածառայողների պահանջած պարզաբանումը տալուց: Ժամը 22 :00-ի սահմաններում զորամասի տարածքում զինվորի նկատմամբ «ինքնադատաստան» է սկսվել: Նրան ծեծել էին: Սամվելն, այլ ելք չգտնելով, վազել էր դեպի զորանոց, որտեղ վերոհիշյալ զինծառայողները շարունակել էին նրան ծեծել: Նա փախել էր զորանոցից, վազել դեպի հսկիչ անցագրային կետ, բայց ուշագնաց էր եղել»,- գրում է թերթը:

Ըստ դատավճռի` ծեծի ու ստորացումների պատճառով Ս.Խաչատրյանը հայտնվել է հոգեկան ճնշված ու նվաստացած վիճակում, որի արդյունքում` հաջորդ օրը` հոկտեմբերի 3-ին, կախվելու եղանակով ինքասպանություն է գործել:

Դատարանում յոթ ամբաստանյալներից և ոչ մեկն իրեն մեղավոր չի ճանաչել: Սակայն դատարանը նրանց առաջադրված մեղադրանքները հաստատված է համարել:

Ըստ դատավճռի` Ռ.Մկրտչյանը դատապարտվել է 7 տարվա, Տ.Համբարձումյանը, Ա.Հովհաննիսյանը, Գ.Հարությունյանը, Ծ.Բարսեղյանը` 5-ական տարվա, Ա.Սարգսյանը և Դ.Ղազարյանը` 4 տարի 6 ամսվա ազատազրկման:

Վերաքննիչ բողոքներում ամբաստանյալները դատարանից խնդրել են ավելի մեղմ պատիժ սահմանել, իսկ Ռ.Մկրտչյանի շահերի պաշտպանը խնդրել է իր պաշտպանյալի նկատմամբ կայացնել արդարացման դատավճիռ, ինչը վերաքննիչ քրեական դատարանի կողմից մերժվել է և առաջին ատյանի դատարանի դատավճիռը Ռ. Մկրտչյանի մասով թողնվել է անփոփոխ: Ռ.Մկրտչյանի շահերի պաշտպանը հայտարարել է, որ դիմելու է Վճռաբեկ դատարան: