Փաստ ինֆո

ԱԻՄ առաջնորդ, ՀՀ Նախագահի նախկին թեկնածու Պ.Հայրիկյանի դեմ մահափորձ պատվիրելու մեջ մեղադրվող Նախագահի մեկ այլ թեկնածու, էպոսագետ Վարդան Սեդրակյանը շարունակում է չընդունել իրեն առաջադրված մեղադրանքը: Այս մասին թերթի թղթակիցը տեղեկացել է Վ.Սեդրակյանի փաստաբան, «Սիրունյան» իրավաբանական գրասենյակի տնօրեն Ալեքսանդր Սիրունյանից: Փաստաբանը նաև ներկայացրել է քննության մի քանի մանրամասներ:

Թղթակիցը Սիրունյանին հարցրել է, թե ինչով է բացատրվում այն, որ նախկինում ցուցմունք տալուց հրաժարված Սեդրակյանն այժմ որոշել է ցուցմունք տալ, փաստաբանը պատասխանել է, որ այն ցուցմունքները, որոնք Սեդրակյանը գտնում է, որ անհրաժեշտ է տալ, տալիս է: Նա մինչ այսօր շարունակում է չընդունել իր մեղքը:

Սիրունյանի խոսքերով` Սեդրակյանը ցուցմունք է տալիս այն հարցերի վերաբերյալ, որոնք կարող են հակասություններ առաջացնել, ցուցմունքները բոլորն ուղղված են գործում հստակություն մտցնելուն:

Թերթը գրում է, որ փաստաբանը քննության ներկայիս ընթացքից գոհ է:

«Գոհացուցիչ չէ միայն այն, որ Վարդան Սեդրակյանն առնված է կալանքի տակ: Իմ կարծիքով` կալանքի տակ պահելու հիմքեր չկան, իսկ մնացածն, իսկապես, առայժմ պետք է գնահատել ոչ բացասական: Հավատացնում եմ Ձեզ, թող զարմանալի չթվա, որ փաստաբանն է ասում, բայց առայժմ գոհացուցիչ է, քննության մարմինը միջոցներ է ձեռնարկում` օբյեկտիվությունը պահելու համար, և մեզ էլ բավական լայն դաշտ է տրվում` պաշտպանվելու համար»,- մեկնաբանել է Սիրունյանը: