Փաստ ինֆո

ՀՀ վարչապետ Տիգրան Սարգսյանը չի մասնակցի ուրբաթ օրը` մարտի 22-ին, ժամը 18-ին Ազատության հրապարակում կայանալիք հանրահավաքին, որովհետև իր «աշխատանքային օրակարգն այլ կարևորագույն միջոցառումներով է լեցուն»: Այս մասին վարչապետը հայտնեց` ի պատասխան «Ժառանգություն» խմբակցության քարտուղար Զարուհի Փոստանջյանի հարցի, ով, մասնավորապես, շնորհավորեց վարչապետին և կառավարության անդամներին` «հայկական մեծ հեղափոխության կապակցությամբ»: Զ.Փոստանջյանը նաև նշեց, որ չի ցանկանում մտածել, որ վարչապետն «անմասն կմնա» այդ հեղափոխությունից և հետաքրքրվեց, թե արդյոք նա կմասնակցի «հայ ժողովրդի հաղթահավաքին»:

«Մենք շատ հարգալից ենք վերաբերվում Ձեր քաղաքական սկզբունքներին, տեսակետներին, Ձեր գնահատականներին, բայց նաև  ուզում եմ խնդրել Ձեզ, որ Դուք էլ հարգեք մեր քաղաքական թիմին, մեր քաղաքական գնահատականների նկատմամբ, մեր վերլուծությունների նկատմամբ նույնպես հարգալից վերաբերմունք դրսևորեք»,-կոչ արեց Տ.Սարգսյանը:

Ինչ վերաբերում է պատգամավորի հարցին, թե արդյոք մարել է հեղափոխություն անելու վարչապետի ցանկությունը, Տ.Սարգսյանն ասաց, որ իրեն հասկանալի է ակնարկը. ժամանակին նա գրել է «Ինչպե՞ս իրականացնել հեղափոխություն» հոդվածը: «Այդ հոդվածում տրամաբանությունը հետևյալն է. առաջին հերթին ցանկացած հեղափոխություն սկսում է մտածողության հեղափոխությունից: Այսինքն` եթե ուզում եք մեր երկրում արմատական հեղափոխական փոփոխություններ կատարել, դուք առաջին հերթին պետք է ձեր գաղափարները ներկայացնեք հանրությանը և հանրությանը վարակեք այդ հեղափոխական գաղափարներով, թե ինչպիսի ապագա եք ուզում կառուցել և ինչ ձևով, և փորձեք զանգվածները տանել այդ ճանապարհով: Եթե այդ մտածողության հեղափոխությունը ես տեսնեմ, և իմ նման մտածող մարդիկ տեսնեն, դա նշանակում է, որ այդ հեղափոխությունը մտածողության մեջ կարելի է իրականացնել, և դա նշանակում է, որ դրանից հետո նաև կյանքում կարելի է իրականացնել փոփոխություն: Ցավոք սրտի, այդպիսի մտածողության հեղափոխություն ես չեմ տեսնում այսօր հրապարակում»,-նշեց ՀՀ վարչապետ Տիգրան Սարգսյանը: