Փաստ ինֆո

Ուրալում բացահայտվել է ստրկատերերի մի խոշորագույն ցանց: Ձեռնարկատերերը զոհերին ստիպել են աշխատել աղբանոցներում, տանջել են սովահարությամբ և պարբերաբար ծեծի ենթարկել:

Քննիչներին հաջողվել է ի հայտ բերել այդպիսի 3 ձեռնարկատիրոջ` Չելյաբինսկում, ովքեր 6 տարվա ընթացքում 200 մարդու ստիպել են աշխատել իրենց համար: Սովորական բանվորներին որպես ստրուկ շահագործելու այս սխեման բացահայտվել է նրանցից մի քանիսի փախուստի դիմելուց հետո:

Քննիչների գնահատմամբ՝ Ռուսաստանում այսպիսի մասշտաբի ոչ ավելի քան 3 քրեական գործ է հետաքննվել:

38-ամյա Վալերի Մ.-ն ստրկատերերի ձեռքն է ընկել պատահաբար, երբ ճանապարհին փորձում էր համընթաց գնացող մեքենա գտնել: Նրա մոտ կանգնած մեքենայի վարորդը առաջարկել է շահավետ, հարմար և կայուն աշխատավարձով աշխատանք: Հենց այդ օրն էլ Վալերին հայտնվել է աղբավայրում:

Աշխատել են առանց հանգստյան օրերի, ամեն օր` առավոտյան ժամը 5-ից մինչև երեկոյան 23-ը: Տեսակավորել և հավաքել են աղբավայրում հայտնված ապակյա և պոլիէթիլենային շշերը, մետաղյա տարրաները: Առավել գնահատվել են գունավոր մետաղները: Եթե թափոնների մեջ որևէ արժեքավոր իր աշխատողը չի նկատել, ապա` ենթարկվել է ծեծի:

Վալերին աղբավայրում աշխատել է 14 ամիս: 8 հոգով ապրում էին այդտեղից ոչ հեռու գտնվող խորդանոցում: Քնում էին հատակին: Խորդանոցում ջերմությունը երբեմն մինչև 40 աստիճան սառնության էր հասնում, իսկ այնտեղ եղած խարխուլ վառարանը անզոր էր արտաքին աշխարհի հետ բազմաթիվ խորշերով ու անցքերով հաղորդակցվող կառույցի սրահը տաքացնել: Նրանց կերակրել են հազվադեպ` երբեմն թեյ են տվել, հաց կամ ծխախոտ: Հաճախ նույնիսկ ջրի խիստ պակաս են ունեցել և իրենց սանիտարական կարիքների համար ստիպված են եղել տեղում եղած կասկածելի մաքրության աղբյուրից օգտվել:

Ստրկական աշխատանքն օգտագործելու մեղադրանքով քննիչների կասկածի տակ են հայտնվել եղբայրներ Ֆարիտ և Խալիլ Գ.-երը և նրանց օգնական Օլեգ Վ.-ն: Նրանց բոլոր հեռախոսազրույցները սկսել են ձայնագրվել: Հենց դրանք էլ դարձել են ստրկատերերի մեղքը հաստատող ուղղակի ապացույցներ:

ՌԴ քր. օրենսգրքի «Նենգասպառնալիքով, բռնությամբ կամ այն կիրառելու սպառնալիքով մեկ կամ ավելի անձանց նկատմամբ Ստրկական աշխատանքն օգտագործելու» հոդվածի հատկանիշներով հարուցվել է քրեական գործ, հաղորդում է «Life News»-ը` հղում անելով ՌԴ Քննչական կոմիտեի քննչական վարչության առանձնահատուկ կարևորության գործերի բաժնի ավագ քննիչ Պավել Դերխոյին:

Կասկածյալներն առայժմ գտնվում են ազատության մեջ, սակայն շուտով նրանց կներկայացվի մեղադրանք: Տուժած են ճանաչվել 7 մարդ, սակայն համաձայն օպերատիվ տեղեկությունների 6 տարվա ընթացքում կասկածյալների ձեռքի տակով անցել է 200 մարդ: Քրեական գործի ծավալն արդեն կազմում են 12 հատոր: