Փաստ ինֆո

Հետընտրական զարգացումների վերաբերյալ Ազգային ժողովի արտահերթ նիստ գումարելու հարցը դեռևս քննարկման փուլում է: Ինչպես լրագրողներին այսօր հայտնել է ՀՀԿ խմբակցության ղեկավար Գալուստ Սահակյանը, փորձ է արվում ևս մեկ անգամ մշակել հայտարարության տեքստը` ընդգծելով, որ ովքեր կցանկանան, կարող են ներկայացնել իրենց առաջարկությունները:

Ըստ նրա, եթե խորհրդարանում ներկայացված ընդդիմադիր քաղաքական ուժերը չցանկանան մասնակցել կամ լինեն լուրջ առարկություններ, բնականաբար, արտահերթ նիստ չի գումարվի: «Առաջարկներն ստացվել են իրենցից, մենք էլ ոչ թե համաձայնվել ենք, այլ ավելի գրագետ մոտեցում ենք ցույց տվել»,-նշել է ՀՀԿ խմբակցության ղեկավարը:

Ինչպես «Pastinfo.am»-ն ավելի վաղ հայտնել էր, ԱԺ-ի մարտի 18-ի նիստում` ի պատասխան «Ժառանգություն» խմբակցության ղեկավար Ռուբիկ Հակոբյանի հարցի, ԱԺ նախագահ Հովիկ Աբրահամյանը հայտարարել էր, որ հետընտրական լարված իրավիճակը քննարկելու նպատակով խորհրդարանի արտահերթ նիստ հրավիրելու կապակցությամբ խորհրդարանական խմբակցությունների ներկայացուցիչների հետ բանակցությունները ինքը ձախողված չի համարում:

«Ես այսօր էլ եմ պատրաստ քննարկել այն հարցերը, որոնք ձեր կողմից ներկայացված են: Ուղղակի մենք ոչ թե դեմ ենք եղել արտահերթ նիստ գումարելուն և հարցը քննարկելուն, այլ մենք առաջարկ ենք արել այդ ձեր ներկայացրած հարցերից մեկի մեջ փոփոխություն անել: Բացի ձեզանից, բոլոր մյուս խմբակցությունները, որ մասնակցել են բանակցություններին, համաձայնվել են, դուք չեք համաձայնվել, դրա համար հետաձգվել է իմ առաջարկը: Ես հիմա էլ եմ պատրաստ և նորից եմ հորդորում բոլոր խմբակցություններին և քաղաքական ուժերին, որ ներկայացված են խորհրդարանում, հավաքվենք, մեկ անգամ ևս քննարկենք»,-հայտարարել էր ԱԺ նախագահը:

Ի պատասխան այս առաջարկին` «Ժառանգություն» խմբակցության ղեկավարը հայտարարեց, որ իրենք այլևս այդ բանակցություններին չեն մասնակցելու. «Որովհետև մենք էինք նախաձեռնել, դուք կարող էիք ուղղակի մերժել մեր ներկայացրած նախագիծը արտահերթ նիստում և ինքներդ ներկայացնեիք, թե այս լարված իրավիճակում ինչպիսի լուծումներ եք տեսնում, ինչ կարող է անել խորհրդարանը»:

Հաջորդ օրը կայացած հերթական խորհրդակցությունից հետո հայտարարությամբ հանդես եկավ նաև «Հայ ազգային կոնգրես» խմբակցության ղեկավար Լևոն Զուրաբյանը, նշելով, որ իշխող կուսակցության կողմից ներկայացվել է հայտարարության նախագիծ, որը բացարձակ որևէ լուծում չի պարունակում ընդդիմության կողմից նախորդ խորհրդակցության ընթացքում բարձրացված հարցերի` սեղմ ժամկետներում բարեփոխել ընտրական համակարգը և անցկացնել արտահերթ նախագահական ու խորհրդարանական ընտրություններ, ուղղությամբ: «Միայն մշուշոտ ձևակերպումներ հնարավոր սահմանադրական և ընտրական համակարգի բարեփոխումների մասին»,-հայտարարեց Լ.Զուրաբյանը:

«Եթե իշխող կուսակցությունը նպատակ ունի քաղաքական ճգնաժամի լիցքաթափման ուղղությամբ երկրի քաղաքական ուժերի հետ հասնել փոխզիջումային համաձայնությունների, ապա ներկայացված առաջարկն ուղղակի ծաղր է ընդդիմադիր ուժերի ու հասարակության նկատմամբ և կարող է նշանակել միայն այն, որ իշխող կուսակցությունը փորձում է ստեղծել ընդդիմության հետ երկխոսելու և բանակցելու պատրանք»,- ընդգծեց ընդդիմադիր խմբակցության ղեկավարը: