Փաստ ինֆո

«Արատավոր ավանդույթ է ձևավորվել մեր երկրում. ամեն անգամ ընտրությունները կեղծելուց հետո իշխանությունները սկսում են խոսել հանդուրժողականության, իշխանություն-ընդդիմություն երկխոսության, ողջամիտ փոխզիջումների անհրաժեշտության մասին, իսկ ընդդիմության պահանջը՝ նոր, արդար ընտրություններ անցկացնելու մասին, համարում մաքսիմալիստական»,- այսօր Ազգային ժողովի հայտարարությունների ժամին նշեց «Հայ ազգային կոնգրես» խմբակցության անդամ, ՀԺԿ նախագահ Ստեփան Դեմիրճյանը:

Ըստ ՀԺԿ նախագահի, ոչ թե պետք է ամեն «կեղծված ընտրությունից հետո քննարկել սահմանադրական փոփոխությունների հարցը, այլ պարզապես հարկավոր է կյանքի կոչել Սահմանադրության 2-րդ՝ անփոփոխ հոդվածը, համաձայն որի՝ ժողովուրդն իր իշխանությունն իրականացնում է ազատ ընտրությունների միջոցով»: «Ի վերջո պետք է հասկանալ, որ ամեն մի կեղծված ընտրություն ետ է շպրտում երկիրը, խորացնում հասարակության բարոյալքումը, նպաստում արտագաղթի աճին»,- մասնավորապես ասաց նա:

Հետընտրական իրավիճակին և այն հաղթահարելու հնարավոր լուծումներին իրենց հայտարարություններում անդրադարձան գրեթե բոլոր պատգամավորները:

«Ժառանգություն» խմբակցության ղեկավար Ռուբիկ Հակոբյանը, դիմելով ՀՀ նախագահ Սերժ Սարգսյանին, մասնավորապես, հայտարարեց, որ եթե նա գտնում է, որ ստեղծված իրավիճակը հնարավոր է լուծել «մերժված առաջարկությունները կրկին անգամ փակ ծրարով հրապարակ հանելու, Րաֆֆիին անպարկեշտ արտահայտությունների մեջ մեղադրելու, ինչպես նաև հացադուլավորին սոված և հիվանդ որակավորելու և նրա հետ զրույցի պատրաստ չլինելու մեջ», ապա ինքը վստահորեն կարող է ասել, որ Սերժ Սարգսյանը իրապես չի պատկերացնում, թե ինչ է կատարվում երկրում և ինչի կարող  է հանգեցնել նրա դիրքորոշումը:

«Առավել քան վստահ եմ, որ այս իրավիճակը պետք է հարթել միմիայն համապարփակ քաղաքական օրակարգի առկայությամբ երկխոսության միջոցով, բայց այդ օրակարգը և առաջարկությունները պետք է համարժեք լինեն ստեղծված իրավիճակին և հաղթողը պետք է լինի մեկը՝  պետությունը»,- ընդգծեց Ռ.Հակոբյանը` հավելելով, որ Րաֆֆի Հովհաննիսյանը և իր կողմնակիցները կողմ են բաց քննարկումներին և երկխոսության միջոցով համապարփակ լուծումներ գտնելուն:

ՀՅԴ խմբակցության քարտուղար Աղվան Վարդանյանն էլ համոզմունք հայտնեց, որ «ուլտիմատումը, դիմակայության սրումը, զիջումների չգնալու արտահայտությունները մեզ որևէ տեղ չեն տանելու, ավելի են խորացնելու հասարակության, իշխանության և քաղաքական ուժերի միջև անջրպետը»:

«Եթե մենք չկարողանանք այս մթնոլորտը լիցքաթափել, նվազեցնելու ենք երկիրը զարգացնելու հնարավորությունները, ունենալու ենք անտարբերություն, հիասթափություն, արտագաղթ, որը համազգային, համապետական լուրջ խնդիր է»,-մասնավորապես հայտարարեց դաշնակցալան պատգամավորը` ընդգծելով, որ անհրաժեշտ են արմատական փոփոխություններ և ստեղծված իրավիճակը հնարավոր է հաղթահարել քաղաքական համաձայնության դեպքում:

Ա.Վարդանյանը նշեց նաև, որ ՀՅԴ-ն ունի ճանապարհային քարտեզ, որը, մասնավորապես, ենթադրում է մեկ տարվա ընթացքում արմատապես փոխել Ընտրական օրենսգիրքը, գնալ 100 տոկոսանոց համամասնական ընտրակարգի, բացառել կրկնակի քվեարկությունները, 2-2,5 տարվա ընթացքում անցկացնել սահմանադրական հանրաքվե, փոխել Սահմանադրությունը, գնալ նոր խորհրդարանական ընտրությունների և  ձևավորել ընդդիմություն-իշխանություն միասնական համակարգ, որում ընդդիմությունը կունենա իշխանությանը վերահսկելու գործուն լիազորություններ:

ՀՀԿ խմբակցության անդամ, Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանն էլ, մասնավորապես, հայտարարեց. «Ո’չ հանրահավաքներով, ո’չ էլ հացադուլներով հայ հասարակությանն այլևս զարմացնել չես կարող։ Զարմացնել կարող ես, թերևս, միայն հստակ ասելիքով։ Փաստ է, որ ասելիքի ու ծրագրերի բացակայությունը հյուծում է քաղաքական օրգանիզմը, ինչին այսօր մենք ականատես ենք ընդդիմադիր բևեռում»։

Ըստ հանրապետականի, ՀՀ նախագահ, ՀՀԿ առաջնորդ Սերժ Սարգսյանի երեկվա ասուլիսը «տվեց հասարակությանը հուզող բազմաթիվ հարցերի պատասխաններ, միաժամանակ այն քաղաքական ազնվության և անկեղծության դրսևորում էր»։ «Հայտնի է, որ ազնիվ ու անկեղծ կարող է լինել միայն ուժեղը»,-հայտարարեց նա։

Հեռակա կարգով դիմելով «Ժառանգություն» կուսակցության նախագահ Րաֆֆի Հովհաննիսյանին` երիտասարդ պատգամավորն ասաց. «Ով՝ ով, գոնե Դուք, պարոն Հովհաննիսյան, պետք է իմանայիք, որ ընդունված չէ մի բան մտածել, երկրորդ բանը հայտարարել հանրահավաքներին, երրորդի շուրջ փորձել բանավիճել, չորրորդը պատմել թիմակիցներին։ Ազնվությունն ու անկեղծությունն ավելի մեծ արժեքներ են»։  Նա հավելեց նաև. «Առիթից օգտվելով՝ միանում եմ բոլոր հորդորներին և դիմում Րաֆֆի Հովհաննիսյանին խնդրանքով դադարեցնել հացադուլը»։