Փաստ ինֆո

Շիրակի մարզի ընդհանուր իրավասության առաջին ատյանի դատարանում շարունակվել է Գյումրու նախկին քաղաքապետ Վարդան Ղուկասյանի դստեր փեսացուի սպանության գործով դատաքննությունը:

Նիստի ընթացքում դատարանը լսել է գործով 4 վկաների:

Ամբաստանյալ Հարություն Սարգսյանի փաստաբան Լուսինե Սահակյանը թերթի թղթակցի հետ զրույցում նշել է, որ չկա գոնե մեկ ցուցմունք կամ ապացույց, որով կարող է հիմնավորվել Հ.Սարգսյանի առնչությունը սպանության կատարմանը:

Ըստ Լ.Սահակյանի` վկաների ցուցմունքներով հիմնավորվել է, որ նախաքննությունը կատարվել է օրենքի խախտումներով:

Լ.Սահակյանը նաև նշել է, որ Հ.Սարգսյանն իրեն առաջադրված մեղադրանքներն ընդունում է մասնակի:

«Հ.Սարգսյանին երկու հոդվածով է մեղադրանք առաջադրված` առաջինը դա սպանություն կատարելու մեջ, որով նա իրեն մեղավոր չի ճանաչում ի սկզբանե երբեք մեղավոր չի ճանաչել ու չի էլ ճանաչում, իսկ 188-րդ հոդվածի 1-ին մասով իրեն մեղավոր է ճանաչում»,- ասել է փաստաբանը:

Լրագրողի հարցին, թե ինչու են բոլոր դատական նիստերին միջադեպեր լինում, Լ. Սահակյանը մասնավորապես ասել է. «Կ.Եսայանի մայրը վստահ է, որ սպանություն կատարողը Հ.Սարգսյանն է և այդ վստահությունը գալիս է նրանից, որ ի սկզբանե` նախաքննության ընթացքում, մամուլում հրապարակումներ եղան` իբրև թե Հ.Սարգսյանն իրեն մեղավոր է ճանաչել, հանրապետության ոստիկանապետը հայտարարել է, որ հանցագործությունը բացահայտված է:

Մեղադրողները և տուժողի իրավահաջորդների ներկայացուցիչները թույլ են տալիս քրեական դատավարության օրենսգրքի կոպիտ խախտումներ, էթիկայի խախտումներ, որի պատճառով էլ դատարանում ստեղծվում է լարված մթնոլորտ, որովհետև պաշտպանական կողմը փորձում է նրանց բերել քրեական դատավարության դաշտ, այսինքն` որպեսզի նրանք գործեն օրենքով սահմանված կարգով»: