Փաստ ինֆո

«Ես մեկ անգամ ևս Կենտրոնական ընտրական հանձնաժողովի անունից նշում եմ, որ 2012թ.-ի մայիսին տեղի ունեցած Ազգային ժողովի ընտրություններն իրականացվել են Ընտրական օրենսգրքի պահանջների լիակատար պահպանմամբ»,- Ազգային ժողովի մարտի 19-ի նիստում հայտարարեց ԿԸՀ նախագահ Տիգրան Մուկուչյանը` ամփոփելով «Հայ ազգային կոնգրես» խմբակցության անդամ Նիկոլ Փաշինյանի հետ բավականին բուռն ընթացած հարցուպատասխանը:

Տ.Մուկուչյանը, ով նախօրեին ԱԺ-ի նիստում ներկայացրեց Հայաստանի Հանրապետության Ազգային ժողովի 2012 թվականի մայիսի 6-ի ընտրությունների կազմակերպման և անցկացման, ընտրական օրենսգրքի խախտումների, առաջարկվող օրենսդրական փոփոխությունների վերաբերյալ ԿԸՀ-ի հաղորդագրությունը, այսօր շարունակեց պատասխանել պատգամավորների հարցերին:

Ընդդիմադիր պատգամավոր Ն.Փաշինյանը ԿԸՀ-ի նախագահին և հանձնաժողովին մեղադրեց թե խորհրդարանական և թե նախագահական ընտրությունները կեղծելու մեջ, համոզմունք հայտնելով, որ դրանց օրինակով կեղծվելու են նաև Երևանի ավագանու մայիսի 5-ի ընտրությունները:

Սրան ի պատասխան` ԿԸՀ նախագահը հայտարարեց, որ իր դաստիարակությունը թույլ չի տալիս կոպիտ արձագանքելու: Նա ընդգծեց, որ խորհրդարանական ընտրությունների վերաբերյալ ԿԸՀ-ի հաղորդագրության մեջ տրված որակումները, ըստ էության, չեն տարբերվում նաև միջազգային կազմակերպությունների, մասնավորապես, ԵԱՀԿ/ԺՀՄԻԳ-ի դիտորդական առաքելության եզրակացություններից: «Հետևաբար` դրանց վերաբերյալ նման ծայրահեղական մոտեցում դրսևորելը, անկեղծ ասած, անհասկանալի է»,-նշեց նա:

Ըստ Տ.Մուկուչյանի, ինչ վերաբերում է ապագայի հետ կապված դատողություններին, ապա մեկ անգամ ևս ցանկանում է նշել, որ «անընկալելի է, երբ դեռևս գործընթացը չսկսված», մեղադրանքներ են հնչում ընտրությունները կեղծելու վերաբերյալ. «Ես, համենայնդեպս, պարտավոր եմ յուրաքանչյուր քաղաքացու նկատմամբ տածել հարգանք և երբևէ չմտածել, որ որևէ քաղաքական ուժի կողմից նշանակված հանձնաժողովների անդամները հանցագործներ են»:

«Եթե Ձեզ թվում է, թե այդ շուտասելուկ բառակույտով տպավորություն եք թողնում, Դուք չարաչար սխալվում եք: Դաստիարակության մասին եք խոսում` Ձեր դաստիարակությունը հերիքում է, որպեսզի Դուք Ազգային ժողովի ամբիոնից մի ամբողջ ժողովրդի և հասարակության ստեք և սուտ փաստեր ներկայացնեք: Ասում եք` դիմումներ ներկայացնեն, մամուլի հրապարակումներին եք հետևել, բայց ինչո՞ւ չեք գրել այս հաշվետվության մեջ, որ մի բնակարանի վրա գրանցվել է Հայաստանի քաղաքացի չհանդիսացող 100 և ավելի մարդ»,-արձագանքեց Ն.Փաշինյանը:

Պատգամավորն անդրադարձավ նաև ԿԸՀ նախագահի վկայակոչած Սահմանադրական դատարանի որոշումներին, ըստ որոնց ընտրական վեճերի քննարկման արդյունքներով անփոփոխ են թողնվել ընտրական հանձնաժողովների վիճարկված բոլոր որոշումները. «Սահմանադրական դատարանը դեռ պետք է իր հարգանքը վաստակեր: Այսօր արգահատելի մարմին է Սահմանադրական դատարանը: Ես պատրաստ եմ ապացուցել իմ ամեն ասած խոսք»: Պատգամավորը բանավեճի հրավիրեց ԿԸՀ նախագահին, նշելով, որ պատրաստ է ցանկացած ձևաչափով ապացուցել ԱԺ ամբիոնից հնչեցրած ամեն բառի ճշմարտությունը և Տ.Մուկուչյանի «ասածների կեղծիք և ստահոդ լինելը»:

ԿԸՀ նախագահն էլ իր հերթին հայտարարեց, որ ծանոթ է այս գործելաոճին, ՍԴ-ում փաստերը նենգափոխված ներկայացնելուն, այդ իսկ պատճառով ավելորդ է համարում հիմնավորումներ ներկայացնելը, որը կփոխի պատգամավորի «կարծրատիպ դարձած տեսակետը կամ կարծիքը»: