Փաստ ինֆո

ՀՀ վարչական դատարանը քննության կառնի ՀՀ նախագահի փետրվարի 18-ի ընտրություններին դիտորդական առաքելություն իրականացրած մի խումբ անձանց հայցն ընդդեմ Կենտրոնական ընտրական հանձնաժողովի:

Հայցվորներ Մարտուն Գրիգորյանը, Խաչատուր Սիրադեղյանը, Տաթևիկ Շալջյանը, Զարուհի Հովհաննիսյանը, Լուսինե Հակոբյանը, Տիգրան Եգորյանը, Տաթևիկ Բարսեղյանը, Լենա Նազարյանը, Նարեկ Բաբայանը, Սոնա Այվազյանը, Նարինե Էսմայելը, Գայանե Բաբայանը պահանջում են վերացնել ԿԸՀ-ի մարտի 6-ի թիվ 67-Ա որոշումը և ընդունել թիվ 17 ընտրատարածքային ընտրական հանձնաժողովին ներկայացված դիմումով առաջադրված պահանջները բավարարող որոշում:

Դատարանում հայցվորների ներկայացուցիչներն են փաստաբաններ Լուսինե Հակոբյանը և Տիգրան Եգորյանը:

ԿԸՀ-ի մարտի 6-ի թիվ 67-Ա որոշմամբ մերժվել է «Իրավունքի Եվրոպա միավորում» հասարակական կազմակերպության դիտորդների բողոքը, որով նրանք խնդրել էին անվավեր ճանաչել թ.17 ԸԸՀ-ի 6-Ա որոշումը: ԿԸՀ-ն գտավ, որ ԸԸՀ-ն գործել է Ընտրական օրենսգրքի նորմերին համապատասխան` իր լիազորությունների սահմաններում: Միաժամանակ ԿԸՀ-ն որոշեց բողոքով ներկայացված նյութերն ընդունել որպես հաղորդագրություն և ներկայացնել ՀՀ գլխավոր դատախազությանը` դրանում ներկայացված փաստերն օրենքով սահմանված կարգով քննության առարկա դարձնելու համար:

Նշենք, որ ԿԸՀ-ում բողոքարկվող ԸԸՀ-ի որոշմամբ մերժվել էր դիտորդների դիմումը, որով նրանք ԸԸՀ-ից խնդրել են իր իրավասությունների սահմաններում ձեռնարկել միջոցներ` դիտորդների կողմից արձանագրված խախտումների քննության և օրենսդրությամբ սահմանված միջոցների ձեռնարկման, այդ թվում` տեղամասային ընտրական հանձնաժողովների գործողությունների և անգործության ուղղությամբ: Նաև` միջոցներ ձեռնարկել խախտումների համար պատասխանատու անձանց, համապատասխան ՏԸՀ-ների կողմից ձեռնարկված գործողությունների և անգործության համար պատասխանատվության ենթարկելու, ինչպես նաև քրեաիրավական բնույթի խախտումները ըստ ենթակայության ուղարկելու և հետամուտ լինելու ուղղությամբ:

Դիմումատուները դիտորդական առաքելություն են իրականացրել թիվ 17 ընտրատարածքի մի շարք տեղամասերում և քվեարկության ընթացքում արձանագրել մի շարք ընտրախախտումներ, նաև` դիտորդների և լրագրողների իրավունքների խախտումներ:

ԸԸՀ-ի փետրվարի 23-ի որոշմամբ դիմում-բողոքը մերժվել է, մասնավորապես, հետևյալ պատճառաբանությամբ` «Ընտրատարածքային ընտրական հանձնաժողովին բողոքարկում են ստորադաս հանձնաժողովի որոշումները, գործողությունները/ անգործությունը, այլ ոչ թե մեկ այլ սուբյեկտի կողմից կատարված իրավախախտումները»: Դիմումը մերժելու պատճառներից մեկն էլ այն չհիմնավորված լինելն էր:

Նշենք նաև, որ «Իրավունքի Եվրոպա միավորում» հասարակական կազմակերպության դիտորդների կողմից քվեաթերթիկների լցոնման, ինչպես նաև դիտորդի և լրագրողի իրավունքների խախտման դեպքեր էին արձանագրվել նաև թ.17/05 ընտրատեղամասում, որին Սահմանադրական դատարանն անդրադարձավ իր մարտի 14-ի որոշման մեջ: ՍԴ-ն այդ տեղամասի արդյունքը համարեց ոչ հավաստի և անվավեր: Իսկ մինչ այդ, ՀՀ Հատուկ քննչական ծառայությունում հարուցվել էր քրեական գործ` նշված տեղամասում արձանագրված չարաշահումների դեպքերի առթիվ: