Փաստ ինֆո

Թերթն անդրադարձել է անցած տարվա դեկտեմբերի 23-ին Խոջալուի հոսպիտալում մահացած նորակոչիկ Նորայր Սահակյանի դեպքին` հիշեցնելով, որ նրա մահվան փաստի առթիվ հարուցվել էր քրեական գործ` ՀՀ քրեական օրենսգրքի 376-րդ հոդվածի 2-րդ մասով:

Թերթը միաժամանակ հիշեցնում է, որ Ն.Սահակյանին Երևանում միանգամից 5 պատվաստում էին կատարել, որից հետո նրա ջերմությունը բարձրացել էր:

«Նշված պատվաստումների պատասխանատուն եղել է Կարեն Ջուլհակյանը, ով, որքան էլ զարմանալի է, հոսպիտալում աշխատում է, որպես գինեկոլոգ»,- նշում է թերթը:

Կ.Ջուլհակյանին միայն նկատողություն են տվել: Ճանապարհային ուղեկցող բժիշկները, զինվորի կյանքի համար պատասխանատվություն կրողներն են եղել ենթասպա Վարուժան Մանասյանը և փոխգնդապետ Սուրեն Աբրահամյանը: Խոջալուի հոսպիտալում այդ օրը պատասխանատու են եղել վերակենդանացման բաժանմունքի պետ Արտաշես Սայադյանը, այդ օրվա հերթապահ բժիշկը` Արկադի Չախոյանը, բուժքույրը` Անահիտ Գրիգորյանը:

Աշխատանքից հեռացրել են Վարուժան Մանասյանին և փոխգնդապետ Սուրեն Աբրահամյանին: Թերթը գրում է, որ պաշտպանության նախարար Սեյրան Օհանյանը նորակոչիկի ծնողներին խոստացել էր հանդիպում կազմակերպել բժիշկների, բոլոր պատասխանատուների հետ:

Եվ ահա փետրվարի 14-ին հանդիպումը կայացել է:

Թերթի թղթակիցը զրուցել է Նորայրի մոր` Կարինեի հետ, ով ասել է, թե բուժքրոջն ուղղված այն հարցին` ինչ է ներարկել իր որդուն, բուժքույրը պատասխանել է` հեղուկ. «Գուցե ծորակից եկած ջուր են ներարկել երեխայիս, իսկ դրանից մի քանի րոպե առաջ հոսպիտալի պետն ասում էր` սրսկումներ են արվել»,- ասել է տիկին Կարինեն:

«Նորակոչիկի ծնողները մինչև հիմա հիմնվում են իրենց երեխայի ասածի վրա: Իսկ երեխան հստակ ասել է, որ ոչինչ չի արվել, որ ընդամենը մի ջերմիջեցնող են տվել: Հստակ է` երեխան մահացել է անտարբերությունից»,- գրում է թերթը` ավելացնելով, որ տղայի ծնողները պայքարելու են մինչև վերջ ու եթե պետք լինի, կգնան մինչև Եվրադատարան: