Փաստ ինֆո

«Ժողովրդավարական Հայրենիք» կուսակցությունը Երևանի ավագանու ընտրություններին նպատակահարմար է համարում մասնակցել ընդդիմադիր միասնական ճակատով: Այս մասին, մասնավորապես, ասված է կուսակցության քաղաքական խորհրդի տարածած հայտարարության մեջ:

Ստորև այն ներկայացնում ենք ամբողջությամբ.

«Ժողովրդավարական Հայրենիք» կուսակցության քաղաքական խորհուրդը, վերլուծելով 2013թ. փետրվարի 18-ի ՀՀ նախագահական ընտրություններից հետո ընթացող զարգացումները և հաշվի առնելով ստեղծված իրավիճակը, նպատակահարմար է համարում Երևանի ավագանու ընտրությունների մասնակցությունը` ընդդիմադիր միասնական ճակատով, համախմբված ըմբոստացած ժողովրդի շուրջ` մյուս կողմում թողնելով Հանրապետական կուսակցությանն իր կցորդների հետ, ինչը կարող է բերել սահմանադրական կարգի հաստատման, պայքարի նոր փուլի հաջողության»:

Չի բացառվում, որ ընդդիմադիրների հետ միասին ընտրություններին մասնակցելու որոշում կայացնեն նաև այլ կուսակցություններ, մասնավորապես` «Հայ ազգային կոնգրես» դաշինքին նախկինում անդամակցածներից:

Ըստ շրջանառվող լուրերի, տարբեր քաղաքական ուժերի մասնակցությամբ վերջին շրջանում տարբեր ձևաչափերով նախնական բանակցություններ են տեղի ունեցել, իսկ վերջերս էլ նման առաջարկ է եղել «Ժառանգության» կողմից: Սակայն կուսակցություններից շատերն առայժմ պաշտոնապես չեն հայտարարել իրենց որոշումների մասին:

Նշենք, որ մարտի 15-ի հանրահավաքում Րաֆֆի Հովհաննիսյանը հայտարարել էր, որ մարտի 22-ին կայանալիք հանրահավաքում կներկայացնի Երևանի ավագանու ընտրություններին իրենց թեկնածուների ցուցակը:

Հիշեցնենք նաև, որ ընտրական ցուցակների գրանցման համար անհրաժեշտ փաստաթղթերը ԿԸՀ ներկայացնելու ժամկետը մարտի 11-ից մինչև մարտի 21-ի ժամը 18-ն է: Մարտի 15-ի դրությամբ առաջադրման որևէ հայտ ներկայացված չէր:
 

Լուսանկարը` Ֆոտոլուրի