Փաստ ինֆո

2012թ. ՀՀ ոստիկանության Շիրակի մարզի քննչական բաժնում քրեական գործ էր հարուցվել անհայտ անձի կողմից Ռոզա Խաչատրյանին ապօրինաբար, դիտավորությամբ սպանելու փաստի առթիվ: Հունիսի 20-ին նշված դեպքի առթիվ հարուցված քրեական գործի շրջանակներում ՀՀ քրեական օրենսգրքի 104-րդ հոդվածի 1-ին մասով մեղադրանք էր առաջադրվել 21-ամյա Հարություն Հարությունյանին: Այս մասին է գրում թերթը` հավելելով, որ օրերս Շիրակի մարզի ընդհանուր իրավասության առաջին ատյանի դատարանում ավարտվել է նշված գործի դատավարությունը:

Ըստ դատավճռի` 2012թ. հունիսի 16-ին` ժամը 21:00-ի սահմաններում, Հարությունը գնացել է Ռոզա Խաչատրյանի տնակ, նրա հետ վիճաբանել` իր մասին վարկաբեկող տեղեկություններ տարածելու շուրջ: Վիճաբանության ընթացքում Հարությունը սեղանից վերցրել է խոհանոցային դանակը և 10 հարված հասցրել տարեց կնոջ որովայնի և կրծքավանդակի շրջաններում և դիմել փախուստի:

Ռոզա Խաչատրյանը մահացել է հիվանդանոցի ընդունարանում:

Նախաքննական մարմնին տված ցուցմունքներում Հ.Հարությունյանն ասել է, որ Ռ. Խաչատրյանն իր անվան հետ խաղացել է` ասելով, որ ինքը «գործ տվող» է:

Ամբաստանյալը և նախաքննության, և դատաքննության ընթացքում իրեն լիովին մեղավոր է ճանաչել և խոստովանական ցուցմունքներ տվել:

Համալիր ստացիոնար դատահոգեբուժական և դատահոգեբանական փորձաքննության եզրակացությամբ՝ Հ.Հարությունյանի մոտ հայտնաբերվել է «սահմանային մտավոր հետամնացություն աֆեկտի անկայունությամբ» հիվանդությունը: Ըստ փորձաքննության եզրակացության` «Նրա մոտ հայտնաբերվել են էմոցիոնալ ոլորտի անկայունություն, բռնկվողություն, անհանդուրժողականություն, հիշաչարություն` մտավոր հետամնացության և մանկավարժական բարձիթողության հետ մեկտեղ»:

Սակայն ըստ փորձագետների` հանցանքը կատարելու պահին Հ.Հարությունյանը չի գտնվել հոգեկան գործունեության որևէ ժամանակավոր խանգարման վիճակում: Նա եղել է սթրեսային վիճակում: Մասնագետները Հ.Հարությունյանին ճանաչել են սահմանափակ մեղսունակ:

Փորձաքննության եզրակացության համաձայն` Հարությունյանը դեպքի պահին չի գտնվել նաև ֆիզիոլոգիական աֆեկտի վիճակում:

2013թ. փետրվարի 1-ի դատավճռով Հարություն Հարությունյանը դատապարտվել է ազտազրկման` 12 տարի ժամկետով:

Հ.Հարությունյանի շահերի պաշտպանը վերաքննիչ բողոք է բերել` խնդրելով իր պաշտպանյալի նկատմամբ, նրա հոգեվիճակը, հիվանդությունները նկատի ունենալով, սահմանել օրենքով նախատեսվածից ավելի մեղմ պատիժ, իսկ եթե դատարանը դա անհնար կհամարի, ապա` գոնե քրեական օրենսգրքի 104-րդ հոդվածով նախատեսված նվազագույն պատիժ: