Փաստ ինֆո

Լոռու մարզի ընդհանուր իրավասության առաջին ատյանի դատարանում ընթանում է խուլիգանության մեջ մեղադրվող սպիտակցի 3 եղբայրների դատավարությունը: Գործն արդեն դատական վիճաբանությունների փուլում է:

Համաձայն մեղադարական եզրակացության` 2012թ. հունիսի 23-ին Գյումրի քաղաքի բնակիչ Արմեն Մկրտչյանը գնացել է Լոռու մարզի Հարթագյուղ համայնք` ինչ-որ հարցեր պարզաբանելու, հանդիպել եղբայրներ Արմեն, Մացակ և Արթուր Բադալյանների հետ: Հանդիպումը վերածվել է վիճաբանության ու ծեծկռտուքի: Ա.Բադալյանը որսորդական հրացանով 2 անգամ կրակել է Ա.Մկրտչյանի ոտքերի ուղղությամբ` նրան պատճառելով առողջության միջին ծանրության վնաս: Սակայն վերջինս որևէ մեկի նկատմամբ որևէ բողոք-պահանջ չի ներկայացրել:

3 եղբայրների փաստաբաններ Ռուբեն Հակոբյանն ու Արտակ Ոսկանյանը պնդում են, որ նշված հանգամանքները չեն համապատասխանում իրականության, ապացույցների բացակայության պայմաններում առաջադրվել է ապօրինի, կամայական մեղադրանք: Փաստաբան Ռուբեն Հակոբյանը թերթի թղթակցի հետ զրույցում խոսել է նախաքննական մարմնի կողմից թույլ տրված խախտումներից և նշել, որ քրեական գործն ի սկզբանե հարուցվել է ոստիկանության Լոռու մարզի քննչական բաժնում` ՀՀ քրեական պօրենսգրքի 112-րդ հոդվածի 1-ին մասով: Սակայն հետագայում գործի քննությամբ սկսել են զբաղվել Տավուշի մարզի իրավապահները:

«Անդրադառնալով մեղադրանքի ապօրինի լինելուն` փաստաբանը նկատում է, որ տուժողը բողոքներ չունի, ներկա են եղել ոչ թե 15-20 վկա, այլ` ընդամենը մեկը, ով հրաժարվել է նախաքննությանը տված ցուցմունքներից` բարձրաձայնելով պատկան մարմինների կողմից բռնությունների ենթարկվելու մասին, մինչ օրս առերես հարցաքննություններ էլ չեն կատարվել»,- գրում է թերթը:

Մեղադրող դատախազը դատարանում պնդել է մեղադրանքը և պատիժ պահանջել` մեղադրյալների համար:

Փաստաբան Ռ.Հակոբյանն այն կարծիքն է հայտնել, որ եթե նման պայմաններում պատկան մարմինները ձգտում են ամեն գնով դատապարտել իր պաշտպանյալներին, ապա այդ ձգտման տակ կամ ապօրինի ցուցումներ պետք է փնտրել, կամ` անձնական ինչ-ինչ շարժառիթներ:

«Կենցաղային հարցի շուրջ վեճը սարքել են խուլիգանություն: Ուզում են անօրինական հարուցված գործը, արհեստածին մեղադրանքը ամեն գնով պաշտպանել: Հիմնազուրկ, առարկայազուրկ մեղադրանք են ուզում դատարանում պաշտպանել` առանց ապացույցների»,- ասել է փաստաբան Ռ.Հակոբյանը: