Փաստ ինֆո

Սահմանադրական դատարանն իրավասու չէ ու չի կարող ստանձնել օրենքով նախատեսված կարգով համապատասխան լիազորությամբ ընտրական գործընթացին մասնակից քաղաքական ուժերի ու նրանց ներկայացնող կամ նրանց կողմից առաջադրված տասնյակ հազարավոր իրավասուբյեկտների, ընտրական հանձնաժողովների, այլ դատարանների լիազորությունների ու պարտականությունների վերակատարումը տասնօրյա ժամկետում, որոնք պաշտոնապես պարտավորված են եղել ՀՀ ընտրական օրեսգրքով սահմանված կարգով ու հստակ ժամկետներում կատարել համապատասխան գործողություններ: Այս մասին, մասնավորապես, ասված է ՍԴ-ի այսօր հրապարակված որոշման պատճառաբանական մասում:

Հիշեցնենք, որ ՍԴ-ն, ելնելով ՀՀ նախագահի թեկնածուներ Րաֆֆի Հովհաննիսյանի և Անդրիաս Ղուկասյանի դիմումների հիման վրա գործի քննության արդյունքներից, որոշեց ուժի մեջ թողնել «Հայաստանի Հանրապետության Նախագահ ընտրվելու մասին» ՀՀ կենտրոնական ընտրական հանձնաժողովի փետրվարի 25-ի թիվ 62-Ա որոշումը:

«Ժամանակին իրենց մասով այդ գործողությունները չկատարելը կամ ոչ պատշաճ կատարելը դիմողի ներկայացուցիչները ձգտում էին լրացնել ոչ իրավաչափ կամ գործնականում անիրագործելի միջնորդություններով` հանրային տպավորություն ստեղծելով, որ Սահմանադրական դատարանը, իբր, կարող էր, սակայն չցանկացավ իրականացնել այն, ինչն իրենք էին պարտավոր ժամանակին, օրենքով իրենց վերապահված լիազորությունների շրջանակներում իրականացնել և ապացուցողական նշանակություն ունեցող փաստարկներով հիմնավորված դիմում ներկայացնել Սահմանադրական դատարան»,- ընդգծված է որոշման մեջ:

Միևնույն ժամանակ ՍԴ-ի որոշման մեջ նշված է, որ դատարանը գտնում է նաև, որ «սահմանադրաիրավական տեսանկյունից երկրում ստեղծված նախընտարական ու հետընտրական իրավիճակը չի կարող քննության առարկա լինել միայն ապացուցողական նշանակություն ունեցող իրավական փաստերի անմիջական համադրման շրջանակներում»:

«Սահմանադրական դատարանը նախ արձանագրում է այն փաստը, որ հատկապես համապետական ընտրությունների արդյունքներով դատարանի նախորդ որոշումները, որքան էլ իրավական առումով հիմնավոր ու փաստարկված են եղել, բովանդակել են հիմնարար իրավական դիրքորոշումներ, այնուամենայնիվ հանրության որոշ շերտերի կողմից միանշանակ չեն ընդունվել: Դրա պատճառը ոչ միայն իրավագիտակցության, իրավական ու քաղաքական մշակույթի առկա մակարդակն է, այլև այն օբյեկտիվ իրողությունը, որ տվյալ ընդհարումն առաջին հերթին երկրի քաղաքական համակարգի ու իշխանության նկատմամբ առկա անվստահության արտացոլանք է, ինչը չի հաղթահարվում: Խնդիրը պահանջում է այնպիսի իրավաքաղաքական լուծումներ, որոնք սահմանադրական հիմնարար սկզբունքների արդյունավետ իրացման ճանապարհով կայուն զարգացման երաշխիքներն ու հանրային վստահության աստիճանն էապես կամրապնդեն»,- մասնավորապես ամրագրված է ՍԴ-ի որոշման մեջ:

ՍԴ-ն գտնում է, որ ընտրական գործընթացներով պայմանավորված հանրային դժգոհության նման արտահայտման խորքային պատճառները սահմանադրաիրավական գնահատումների տեսանկյունից շատ ավելի խորն են. «Դրանք զգալի չափով պայմանավորված են տասնամյակների ընթացքում երկրում քաղաքական, տնտեսական ու վարչական ներուժի սերտաճման այն միտումներով, երբ սահմանադրական հիմնարար արժեքների ու սկզբունքների, մասնավորապես իշխանությունների բաժանման ու հավասարակշռման սկզբունքի ձևախեղման վտանգ է առաջանում»:

Ինչպես նախապես հայտարարել էր ՍԴ նախագահ Գագիկ Հարությունյանը, նա ընթերցեց 34 էջից բաղկացած որոշման պատճառաբանական և եզրափակիչ մասերը: Որոշումն ամբողջությամբ գալիք երկուշաբթի օրը կտեղադրվի ՍԴ-ի պաշտոնական կայքէջում և կուղարկվի դատավարության կողմերին: