Փաստ ինֆո

«Որպես սկզբունք մեր ժողովուրդը մասնակցելու է բոլոր հնարավոր ընտրություններին, այդ թվում Երևանի քաղաքի ընտրություններին: Եվ այն ցուցակը, որ ձեզ կներկայացվի հաջորդ շաբաթ` մեր հաջորդ հանրահավաքին, կրելու է Երևանի հաղթանակը, և Երևանի հաջորդ քաղաքապետը լինելու է մեզանից մեկը»,- Ազատության հրապարակում մարտի 15-ին կայացած հանրահավաքում հայտարարեց Րաֆֆի Հովհաննիսյանը` հավելելով. «Դա ես չեմ լինելու` դա լինելու է մեզանից մեկը, և մենք միասին այդ հաղթանակը տանելու ենք Երևան և ոչ թե վերցնելու ենք քաղաքը, այլ վերադարձնելու ենք քաղաքը Հայաստանի ժողովրդին»:

Ներկայացնելով առաջիկա միջոցառումների ծրագիրը` Ր.Հովհաննիսյանը հայտնեց, որ վաղը` ժամը 17:00-ին, Ազատության հրապարակում տեղի կունենա «Հայկական ռոքի փառատոն» հավաք-համերգ:

Կիրակի օրվանից մինչև հինգշաբթի` ժամը 17-ին, մեկնարկելու է քաղաքացիական խորհուրդը (ֆորումը), որը «մեզ բերելու է նոր Հայաստան, նոր իշխանություն, նոր գործադիր, նոր դատական իշխանություն և հետո` նոր օրենսդիր»:

Այս ֆորումի առաջին բանախոսը, ով իր հետ կբերի երկրորդ բանախոս, և հետո կլինի հարցուպատասխան ժամը 17-ից մինչև 18.30-ը, կլինի Նիկոլ Փաշինյանը:

Երկուշաբթի օրը բանախոսը կլինի Անդրիաս Ղուկասյանը:

Ժամը 18.30-ից հետո կլինեն մշակութային և այլ նախաձեռնություններ:

Հաջորդ հաղթահավաքը տեղի կունենա հաջորդ ուրբաթ` մարտի 22-ին, ժամը 18-ին: Առաջինը ելույթ կունենա Ր.Հովհաննիսյանը:

Հաջորդ շաբաթ օրը կլինի երաժշտական փառատոնի շարունակությունը: