Փաստ ինֆո

Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանում լսվում էր ժամկետային զինծառայող Սենո Ղուկասյանի գործը, ով մեղադրվում էր ՀՀ քրեական օրենսգրքի 359-րդ հոդվածի 1-ին մասով` զինծառայողների փոխհարաբերությունների կանոնագրքային կանոնները խախտելը:

Ըստ մեղադրանքի` դեպքը տեղի է ունեցել 2012թ. նոյեմբերի 14-ին` ճաշարան գնալու համար կազմած շարքի մեջ:

Ս. Ղուկասյանը անզգուշորեն ձեռքի արմունկով հարվածել էր շարահրապարակում շարքի մեջ կանգնած ծառայակից ընկերոջը` Ա.Մկրտչյանին:

Վերջինս Ս.Ղուկասյանին հորդորել էր ուղիղ կանգնել «Եվ որպեսզի հորդորն ի կատար ածվի, ոտքով թեթևակի հարվածել էր նրա ոտքին»,- գրում է թերթը:

Հարվածից շարքային Ղուկասյանը կտրուկ շրջվել և անզգուշաբար արմունկով հարվածել էր ծառայակցի դեմքին` պատճառելով մարմնական վնասվածք` արտահայտված ձախ աչքի ստորին կոպի արյունազեղման ձևով, որը, սակայն, առողջության թեթև վնասի հատկանիշներ չի պարունակել:

Ըստ Ս. Ղուկասյանի շահերի պաշտպան Սիրվարդ Ասլանյանի` ՀՀ ՊՆ ռազմական ոստիկանության կողմից նախապատրաստված նյութերը կարող էին քրեական գործ ու դատաքննության առարկա չդառնալ, եթե հետաքննական կամ նախաքննական մարմինը նյութերով քրեական գործի հարուցումը մերժեր:

«Պաշտպանության նախարարությունում սկզբունքորեն քրեական գործ է հարուցվում անգամ չնչին ապտակի դեպքում: Տպավորություն ունեմ, թե քննիչները խուսափում են լրիվ, օբյեկտիվ և բազմակողմանի քննություն կատարել, որպեսզի քրեական գործի վարույթը չկարճվի: Կարծում եմ` նրանց մտավախությունը վերադասի մոտ իրենց անաչառությունը կասկածի տակ դնելն է: Արդյունքում` հարցի լուծման լավագույն տարբերակ է դառնում սառնասիրտ անտարբերությամբ, թերի քննական կամ անհիմն մեղադրանքով գործը դատարան ուղարկելը: Նրանք չեն էլ մտածում, որ դրանով երիտասարդ ճակատագրեր են խեղում, կենսագրություններ փչացնում»,- ասել է հանրային պաշտպան Ս. Ասլանյանը:

Դատարանը, Ս.Ղուկասյանի գործողություններում հանցակազմ չգտնելով, զինծառայողին առաջադրված մեղադրանքը որակել է անհիմն և արդարացման դատավճիռ կայացրել, ինչն անակնկալի է բերել շարքային Ս.Ղուկասյանին: