Փաստ ինֆո

Ռուսական հատուկ ծառայությունները սովորել են գաղտնալսել «Skype» համացանցային հեռախոսազրույցները, հղում անելով «Ведомости» թերթին հաղորդում է «lenta.ru» կայքը:

Ըստ կիբերհանցագործություններն ուսումնասիրող «Group-IB» ընկերության գլխավոր տնօրեն Իլյա Սաչկովի՝ հատուկ ծառայություններն արդեն մի քանի տարի է, որ կարող են գաղտնալսել «Skype»-ով վարվող խոսակցությունները, ինչպես նաև որոշել օգտատերերի գտնվելու վայրը: Սաչկովը նշել է, որ այդ իսկ պատճառով իր ղեկավարած հաստատության բոլոր աշխատակիցներին արգելվել է «Skype»-ով գործնական խոսակցություններ վարել:

Իսկ վճարովի համակարգերին ծառայություն մատակարարող «Peak Systems» ընկերության գործադիր տնօրեն Մաքսիմ Էմմն ասել է, որ 2011թ.-ի մայիսին «Skype»-ը ձեռք բերած «Microsoft» ընկերությունը սպասարկման ծառայության տեխնոլոգիան հագեցրել է օրինական գաղտնալսման հնարավորությամբ: Ցանկացած բաժանորդի կարելի է վերամիացնել հատուկ ռեժիմին, որի միջոցով գաղտնագրման բանալիները գեներացվում են ոչ թե օգտատիրոջ սարքում, այլ` սերվերի մեջ:

Նա ով մուտք ունի դեպի սերվեր, կարող է, համապատասխանաբար, լսել օգտատիրոջ խոսակցությունը կամ կարդալ նրա գրագրությունը: Ինչպես պարզաբանել է Մաքսիմ Էմմն, այդպիսի ծառայություն «Microsoft»-ը մատուցում է աշխարհի շատ երկրների հատուկ ծառայությունների և ոչ միայն Ռուսաստանին:

Միաժամանակ թերթն առանց անուն նշելու, հղում անելով տեղեկատվական անվտանգության մասնագետներին, գրում է, որ ռուսական հատուկ ծառայությունները միշտ չէ, որ դատարանի որոշմամբ «Skype»-ով ընթացող խոսակցությունները գաղտնալսելու հնարավորություն են ստանում: Հաճախ դա իրականացվում է պարզապես հարցում անելով:

«Microsoft»-ի պաշտոնական ներկայացուցիչները, ինչպես նաև Ներքին գործերի նախարարությունը և Դաշնային անվտանգության ծառայությունը բացատրություններ չեն տալիս:

Մի քանի օր առաջ «Bloomberg Businessweek» թերթը, հղում անելով 27-ամյա ամերիկացի ուսանող Քնոքել Ջեֆրիի հետազոտությանը, գրել է այն մասին, որ «Skype»-ի չինական տարբերակում՝ «TOM-Skype»-ում, կա բաժանորդի գործողություններին հետևելու հնարավորություն:

Ինչպես ցույց է տվել Քնոքելը չինական բաշխիչ «Skype»-ի մեջ է մտնում այսպես կոչված «ստեղնաշարային լրտեսը», որը ստեղնաշարի վրա օգտագործված տառերի և թվերի հերթականությունը հիշող ծրագիր է: Քնոքելի տվյալներով՝ այդ ծրագիրը ստուգում է «Skype»-ում հավաքած հաղորդագրության մեջ անցանկալի բառերի առկայությունը, իսկ հավաքած տվյալները առաքում է չինական հատուկ ծառայություններին:

Քնոքելի ասելով «TOM-Skype»-ում հետախուզվում են ինչպես ռեսուրսներում պոռնոգրաֆիայի և թմրանյութերի հետ առկա հղումներն, այնպես էլ կոնկրետ բառեր, ինչպիսիք են` «Human Rights Watch»-ը, «Լրագրողներ առանց սահմանի»-ն, «BBC News»-ը: Բացի այդ, չինական հատուկ ծառայությունների տեսադաշտ են ընկնում այն խոսակցությունները, որոնցում քննարկվում են բողոքի ակցիաներ անցկացնելու պլանները: