Փաստ ինֆո

«Երեք օրերին, որ ընթանում էր դատավարությունը, կարծում եմ, բոլորին հայտնի դարձավ, թե ինչ քանակի դիմումների մասին է խոսքը, ինչ կերպ և ինչ ծավալով է օգտվել կողմն իր իրավունքներից, ու այդ ամենից հետո մերկապարանոց հայտարարություններն ու հռետորական հարցադրումները` կապված հազարավոր դիմումները չքննելու, դրանցից խուսափելու հետ, մեղմ ասած, ուղղակի տարակուսանք է առաջացնում»,- Սահմանադրական դատարանի որոշումը հրապարակելուց հետո լրագրողներին ասաց պատասխանող կողմի ներկայացուցիչ` Կենտրոնական ընտրական հանձնաժողովի նախագահ Տիգրան Մուկուչյանը:

Ըստ նրա, դատաքննության ընթացքում մեկ անգամ ևս փաստվեց, որ ներկայացված բոլոր դիմումները պատշաճ ընթացակարգերով քննություն անցել են, քննարկվել են, չի եղել որևէ բողոք, որից որևէ հանձնաժողով հրաժարված լինի: «Այլ խնդիր է, որ այդ քննության արդյունքում կայացված որոշումները, գուցե, չեն բխել դիմողի խոհերից, հույզերից, ցանկություններից ու երազանքներից»,-ընդգծեց ԿԸՀ նախագահը` հավելելով, որ համաձայն չլինելու պարագայում կար ընթացակարգ` դիմել դատական կարգով վիճարկելու այդ որոշումները, ինչը չի արվել:

Նշվեց նաև, թե ինչ վերաբերում է 17/05 ընտրական տեղամասի հետ կապված ՍԴ-ի դիրքորոշմանը, որքանով պարզ դարձավ որոշման հրապարակումից, ըստ էության, այդ տեղամասի արդյունքը համարվեց ոչ հավաստի և անվավեր: Տ.Մուկուչյանի բնորոշմամբ, ՍԴ-ն արձանագրեց, որ այս դեպքում գործ ունենք կոնկրետ փաստական հանգամանքերի հետ, և, եթե մեկ տեղանասում նկատվել է որևէ թերություն, բնական է, որ դա չի կարող կարծիք ձևավորել, որ մյուսներում ևս եղել է նույնը: Ըստ նրա, ավելին` ինքը կարող է ասել, որ «այդ տեղամասի վերաբերյալ եղել են դիմումներ, իսկ մյուսներում չկան այդ դիմումները, որովհետև չի էլ եղել թերություն»:

ՍԴ-ում քննվող գործով երրորդ կողմ ճանաչված Սերժ Սարգսյանի ներկայացուցիչ Դավիթ Հարությունյանն էլ, անդրադառնալով հրապարակված որոշման մեջ արձանագրված օրենսդրական բարեփոխումների, անվստահության մթնոլորտը փարատելու անհրաժեշտությանը, նկատեց, որ Ընտրական օրենսգրքի վերջին բարեփոխումների հիմնական նպատակը քաղաքական գործընթացի բոլոր մասնակիցներին պատշաճ վերահսկողություն իրականացնելու հնարավորություն ընձեռող մեխանիզմների ստեղծումն էր: Ըստ նրա, դա միտված է նաև հանրային վստահության բարձրացմանը, սակայն, դա, իհարկե, ժամանակ է պահանջում, նաև գործընթացին մասնակցող քաղաքական ուժերի ցանկությունը` իսկապես պատշաճ կատարել իրենց պարտականությունները:

Դ.Հարությունյանն ընդգծեց, որ տեղամասային ընտրական հանձնաժողովներում իշխանական ուժերը` ՀՀԿ-ն և  «Օրինաց երկիր»-ն ունեն ընդամենը մեկական ներկայացուցիչ: Նա նկատեց, որ եթե բոլոր քաղաքական ուժերի կողմից նշանակված հանձնաժողովների անդամները «պատշաճ կատարեն իրենց գործառույթները, հանրային վստահությունն անխուսափելիորեն կկայանա»:

Նա չբացառեց, որ որոշ նոր առաջարկներ կանի Ընտրական օրենսգրքի հետ կապված. «Որպեսզի ավելի ցցուն դարձնեմ քաղաքական ուժերի պատասխանատվությունը, որպեսզի չլինեն քաղաքական ուժեր, որոնց ներկայացնող անդամներն ունեն նույնքան իրավունքներ, ինչքան, ենթադրենք, Հանրապետական կուսակցությունը ներկայացնող անդամները, բայց նրանք կանգնեն մեղադրողի դիրքում` չկիսելով պատասխանատվությունը»:

ՍԴ-ում Րաֆֆի Հովհաննիսյանի ներկայացուցիչ Զարուհի Փոստանջյանը` անդրադառնալով իրենց վստահված անձանց ուղղված քննադատությանը, ընդգծեց, որ նրանք «պահել են ձայները, որոնք կազմել են 540 հազար»: «Խոսել միայն մեկ ընտրատարածքի մասով, այն էլ մեր կողմից ներկայացված, որ կուղարկենք դատախազություն, սա մեկ անգամ ևս մատնանշում է, որ իրավապահ մարմինները և ընդհանրապես այս գործընթացի կազմակերպիչներն ուղղակի դրսևորել են բացարձակ անգործություն»,-նշեց նա:

Լուսանկարը` Ֆոտոլուրի