Փաստ ինֆո

Մարտի 13-ին Տավուշի մարզի ընդհանուր իրավասության առաջին ատյանի դատարանում շարունակվել է պայմանագրային զինծառայող, լեյտենանտ Արտակ Նազարյանի մահվան գործով դատավարությունը:

Այս գործով դատաքննության փուլն ավարտվել է և սկսվել են դատական վիճաբանությունները:

Մեղադրողներ Հայկ Հարոյանը և Հարություն Հարությունյանը հանդես են եկել մեղադրական ճառերով:

Համաձայն մեղադրանքի` Վ. Սարգսյանի անվան ռազմական ինստիտուտն ավարտած, գումարտակի հրամանատարի տեղակալ, կապիտան Հակոբ Մանուկյանը հակակրանք է տածել Ա. Նազարյանի հանդեպ, նսեմացրել նրա արժանապատվությունը, ինչն արել է զինվորների ներկայությամբ: Հ.Մանուկյանը տարբեր առիթներով մի քանի անգամ կռվի է բռնվել Ա.Նազարյանի հետ, հարվածել նրան: Մեղադրանքի համաձայն` Ա.Նազարյանին նսեմացրել, հարվածել են նաև հարևան հենակետի ավագ, լեյտենանտ Վահագն Հայրապետյանը և Ա.Նազարյանի ենթակա ժամկետային զինծառայողներ Մխիթար Մխիթարյանը, Հարութիկ Կիրակոսյանը, Ադիբեկ Հովհաննիսյանը:

Մեղադրողները հայտարարել են, որ Ա.Նազարյանն, ունենալով ներփակ բնավորություն և չկարողանալով հաշտվել իր իդեալների կործանման հետ, դիմել է ինքասպանության:

Սակայն Արտակի հարազատները, ինչպես գրում է թերթը, ցուցմունք էին տվել, որ նա, լինելով հավատացյալ, չէր կարող ինքնասպանություն գործել:

Մեղադրողները պահանջել են ՀՀ քրեական օրենսգրքի մի շարք հոդվածների համակցությամբ կապիտան Հ.Մանուկյանին դատապարտել ազատազրկման 13, լեյտենանտ Վ.Հայրապետյանին, ժամկետային զինծառայողներ Ա. Հովհաննիսյանին, Մ.Մխիթարյանին` 4-ական, իսկ ժամկետային զինծառայող, ներկայումս զորացրված Հ.Կիրակոսյանին` 2 տարի ժամկետով:

Դատական հաջորդ նիստը նշանակված է մարտի 26-ին: