Փաստ ինֆո

Օրեր առաջ Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում տեղի է ունեցել գերմանացի ներդրող Ստեֆան Լաքսհուբերի ներկայացրած «Իստինվեստոր» ընկերության հայցի քննությունն ընդդեմ Գագիկ Ծառուկյանին պատկանող Երևանի «Արարատ» կոնյակի-գինու-օղու կոմբինատի:

«Իստինվեստոր»-ի փաստաբան Արա Զոհրաբյանը թերթի թղթակցին հայտնել է, որ նիստում դատարանը վճիռ կարդալու փոխարեն վերսկսել է գործը և կրկին հեռացել խորհրդակցական սենյակ` հայտարարելով, որ վճիռը կայանալու է մարտի 18-ին` ժամը 17:00-ին:

Թերթը գրում է, որ սա արդեն 4-րդ անգամն է, որ դատավորը նման կերպ է վարվում:

Ինչո՞ւ է այսքան անվճռական դատավորը, և ինչո՞ւ է անհիմն ձևով հետաձգում վճռի կայացումը:

Թերթը հիշեցնում է, որ Ստեֆան Լաքսհուբերը hetq.am-ի հետ զրույցում նշել էր, որ ինքը պատրաստ է երկարամյա, նույնիսկ տասնամյակներ տևող պայքար մղել ընդդեմ Գագիկ Ծառուկյանի և նրա «Արարատ» կոնյակի-գինու-օղու կոմբինատի դեմ, որպեսզի վերականգնվի իրենց սեփականության խախտված իրավունքը:

Ըստ նրա` այս գործն առանցքային է այն հարցում, թե ինչպես է պաշտոնական Հայաստանը վերաբերվում օտարերկրյա ներդրողներին:

Ըստ hetq.am-ի հրապարակման՝ կոմբինատի բաժնետերերի` 2008թ. հոկտեմբերի 12-ի ընդհանուր արտահերթ ժողովը որոշել էր համախմբել կոմբինատի բաժնետոմսերը` դրանցից ամեն 2363.5 հատը փոխարինելով մեկ նոր բաժնետոմսով, որի անվանական արժեքը 18 908 000 ՀՀ դրամ է: Իսկ ընկերության մեկ ամբողջական բաժնետոմսի շուկայական արժեքը, որով հետ էր գնվել բաժնետերերից, սահմանվել էր 28 000 դրամ: Մինչդեռ «Իստինվեստոր»-ը մեկ բաժնետոմսը ձեռք էր բերել 105 հազար դրամով:

«Այս կերպ «Մուլտի Գրուպը» դիտավորյալ փորձում է զրկել փոքր բաժնետրերին սեփականության իրավունքից` ակնհայտ խախտելով ՀՀ Սահամանդրությունը և օրենքները»,- գրում է թերթը: