Փաստ ինֆո

ՀՀ նախագահի թեկնածու Րաֆֆի Հովհաննիսյանը նախագահական ընտրություններին 1009 ընտրատեղամասերում ունեցել է վստահված անձ, իսկ «Ժառանգություն» կուսակցությունը` տեղամասային ընտրական հանձնաժողովների 1884 անդամ: Այս մասին Սահմանադրական դատարանի մարտի 13-ի նիստում հայտնեց ՀՀ ոստիկանության իրավաբանական վարչության պետ Թաթուլ Պետրոսյանը` «Հայաստանի Հանրապետության Նախագահ ընտրվելու մասին» ՀՀ կենտրոնական ընտրական հանձնաժողովի փետրվարի 25-ի թիվ 62-Ա որոշումը վիճարկելու վերաբերյալ ՀՀ նախագահի թեկնածուներ Րաֆֆի Հովհաննիսյանի և Անդրիաս Ղուկասյանի դիմումների հիման գործի քննության շրջանակներում ներկայացնելով հարակից պատասխանողի` ՀՀ ոստիկանության բացատրությունները:

«Ընտրական հանձնաժողովներում նման ներկայացվածություն ունենալու դեպքում հայտարարել, որ ընտրություններն ընթացել են համատարած և համակարգային խախտումներով, լցոնումներով, իրավախախտման վերաբերյալ ընդամենը 98 հարցադրում ներկայացնելը, մեղմ ասած, իրատեսական չէ: Հակառակ դեպքում` կարծիք է ձևավորվում, որ դիմող կողմի ներկայացուցիչները տիրապետում են իրավախախտումների վերաբերյալ ավելի մեծ ծավալի տեղեկության, սակայն չեն ներկայացրել բարձր դատարան»,-ընդգծեց Թ.Պետրոսյանը:

Ըստ նրա, ավելին` եթե յուրաքանչյուր վստահված անձ ներկայացներ «նույնիսկ մեկ տեղեկություն, իբրև թե, լցոնումների, բաց քվեարկությունների և այլ ընտրախախատումների վերաբերյալ», ապա հասկանալի է, որ արձանագրված չէինք ունենա ընդամենը 282 ահազանգ»:

Թ.Պետրոսյանը հայտարարեց, որ դիմող կողմի ներկայացուցիչների այն պնդումները, որ «ՀՀ նախագահի ընտրություններն անցել են համակարգային լցոնումներով, բաց քվեարկությունների և իրավախախտումների պայմաններում, հիմնազուրկ են»: Այս հիմնավորումները նկատի ունենալով` ՀՀ ոստիկանության ներկայացուցիչը խնդրեց ՍԴ-ին մերժել «Հայաստանի Հանրապետության Նախագահ ընտրվելու մասին» ՀՀ ԿԸՀ-ի փետրվարի 25-ի թիվ 62-Ա որոշումն անվավեր ճանաչելու մասին դիմող կողմի պահանջը:

Լուսանկարը՝ Ֆոտոլուրի