Փաստ ինֆո

Ընտրական հանձնաժողովները գործել են բաց և հրապարակային, դիմումների քննության մասին դիմող կողմի ներկայացուցիչներն իրազեկված են եղել, և, եթե դիմող կողմը համաձայն չէր նշված որոշումների իրավական դիրքորոշումներին կամ դրանցով տված իրավական գնահատականներին, ապա ուներ և բավարար ժամանակ, և բավարար իրավական հնարավորություն` նշված որոշումները վիճարկելու: Այս մասին Սահմանադրական դատարանի այսօրվա նիստում, ավարտելով ՀՀ նախագահի ընտրության մասին ԿԸՀ-ի որոշումը վիճարկելու վերաբերյալ գործով իր բացատրությունները, նշեց ԿԸՀ-ի նախագահ Տիգրան Մուկուչյանը:

Ըստ նրա, եթե դիմող կողմը նշված որոշումները «չի վիճարկել սահմանված կարգով և ժամկետներում, ապա դրանք բարձր դատարանին ներկայացնելու նպատակը, մեղմ ասած, անհասկանալի է»: «Դիմումին կից ներկայացված բոլոր թղթակցությունները տարբեր էլեկտրոնային կայքերից տպագրված անստորագիր թղթեր են, որևէ ապացուցողական նշանակություն չունեն, և պատասխանող կողմը գտնում է, որ նշված թղթակցությունը չէր կարող ընդհանրապես հանդիսանալ քննության առարկա բարձր դատարանի կողմից: Ինչ վերաբերում է ներկայացված սկավառակներին, ապա դրանք վերաբերում են քվեարկության օրը տեղամասային կենտրոններում տեղ գտած ինչ-ինչ միջադեպերին, որոնց վերաբերյալ ներկայացված են եղել համապատասխան հաղորդումներ, ոստիկանությունում ընթանում են համապատասխան վարույթներ: Այդ նյութերի մեծ մասը տվյալ վարույթներով արդեն իսկ հանդիսացել է ուսումնասիրության նյութ, ուստի նշված սկավառակի նյութն այս գործով ևս չի կարող որևէ արժեք ունենալ»,-հայտարարեց ԿԸՀ-ի նախագահը:

Նա հայտարարեց, որ ԿԸՀ-ն, Ընտրական օրենսգրքի համաձայն, ամփոփել է ընտրությունների արդյունքները և դրանց հիման վրա ընդունել ՀՀ նախագահ ընտրվելու մասին որոշում, որը «միանշանակ իրավաչափ որոշում է»:

Տ.Մուկուչյանը հայտարարեց նաև, որ, ըստ պատասխանող կողմի, ՀՀ նախագահի թեկնածուներ Րաֆֆի Հովհաննիսյանի և Անդրիաս Ղուկասյանի ՍԴ ներկայացրած երկու դիմումներն էլ անհիմն են. «Խնդրում ենք բարձր դատարանին մերժել երկու դիմումներն էլ»: