Փաստ ինֆո

Այսօր ՍԴ-ը շարունակեց ՀՀ նախագահի թեկնածուներ Րաֆֆի Հովհաննիսյանի և Անդրիաս Ղուկասյանի դիմումների հիման վրա միավորված գործի քննությունը, որով վիճարկվում են ՀՀ նախագահի փետրվարի 18-ի ընտրությունների արդյունքները:

Ա. Ղուկասյանը ներկայացրեց իր բացատրությունները, որոնք հիմնականում հիմնված էին ԿԸՀ կայքում ըստ տեղամասերի հրապարակված քվեարկության արդյունքների վերլուծության վրա: Ըստ այդմ, մասնավորապես՝ 414 ընտրատեղամասերում առկա է անհամաձայնություն ընտրողների ցուցակում քվեարկության համար գրանցված անձանց և քվեատուփում առկա ծրարների և քվեաթերթիկների սահմանված նմուշի քվեաթերթիկների թվի միջև: Բոլոր այդ տեղամասերում քվեարկության մասնակիցների թիվը գերազանցում էր քվեաթերթիկների թվին:

Ըստ մեկ այլ տվյալների՝ թվով 469 տեղամասերի քվեարկության տվյալները ճիշտ հակառակ պատկերն էին վկայում: Ա. Ղուկասյանը նաև նշեց, որ 1988 ընտրատեղամասերից 576-ում ՀՀ նախագահի թեկնածու Ս. Սարգսյանը հավաքել է շատ բարձր տոկոսներ ինչը, իր բնորոշմամբ, հիշեցնում է բոլորիս ծանոթ խորհրդային ժամանակները Նա նաև ընդգծեց, որ հիշյալ 576 տեղամասերում քվեարկությանը մասնակցել է 375 000 ընտրող կամ ընտրողների 76 և ավելի տոկոսը: Ըստ նրա՝ այս տվյալները վստահելի լինել չեն կարող:

Դիմողը նաև ներկայացրեց օրինակներ, երբ ընտրատեղամասերում գրանցվել են 95-100 տոկոս մասնակցություն: Արձանագրելով այս փաստերը նա եզրակացրեց, որ 500-ից ավելի ընտրական տեղամասերում ընտրական հանձնաժողովների եռաստիճան համակարգի կողմից ցուցաբերվել է «սառնասիրտ մոտեցում»: Նա կրկին անդրադարձավ ՀՀ նախագահ Ս. Սարգսյանի Սերժ Թանգյանին ուղղված պատասխան նամակին, որում գործող նախագահը վստահեցրել էր, որ ինքն է կազմակերպել ընտրությունները: Այդ կապակցությամբ նա նշեց, որ ՀՀ նախագահը անձամբ էր ստորագրել ընտրական օրենսգիրքը և չէր կարող չիմանալ, որ ընտրությունները Հայաստանում կազմակերպում է ընտրական հանձնաժողովների եռաստիճան համակարգը: Դիմողը նաև ընդգծեց, որ Ս. Սարգսյանի նամակը «արտահայտում է իր արժեքային համակարգը», և ընդգծում, «որ ինքը նույնացնում է իրեն պետության հետ»:

Ա. Ղուկասյանը ՍԴ-ի ուշադրությունը հրավիրեց այն փաստի վրա, որ ԿԸՀ-ի կողմից ուսումնասիրված վարույթից դուրս է մնացել այսօրինակ անարժանահավատ քվեարկության պատկերը, մինչդեռ նույն ԿԸՀ-ի ներկայացուցիչները փորձում էին ՍԴ-ում ընդդիմադիր թեկնածուներից պարզել, թե ինչու վերջիններս չեն բողոքարկել բոլոր այն տեղամասերի քվեարկության արդյունքները, որոնցում խնդիրներ են նկատել: Ա. Ղուկասյանն ընդգծեց, որ Ր. Հովհաննիսյանը ներկայացրել է 127 բողոք, իսկ ինքը սկզբունքորեն ոչ մի հատ, սակայն արդյունքը եղել է նույնը: Նա վստահեցրեց, որ իրենց կողմից արդյունքների վիճարկումը անձնական խնդիր չէ այլ ուղղված է հանրության վստահության բարձրացմանը՝ շեշտելով, որ պետությունը ընտրություններում պետք է միշտ ունենա չեզոք դիրք:

Այս պահին իր առարկություններն է ներկայացնում ԿԸՀ նախագահ Տիգրան Մուկուչյանը:

Լուսանկարն՝ ըստ Ֆոտոլուրի