Փաստ ինֆո

«Ուժը արյուն չէ, ուժը մեր միասնությունն է, հաղթանակն է, ո’չ մի արյուն: Եթե ապրիլի 9-ին պարոն Սարգսյանը կեղծ երդում տա Սահմանադրության ու Աստվածաշնչի վրա, եթե Վեհափառ Հայրապետը պղծի Աստվածաշունչը` օրհնելով ժողովրդին հակասող, խեղող, ծաղրող թեկնածուին, դա իրենք կանեն իմ դիակի վրա»,- այսօր Ազատության հրապարակում կայացած հանրահավաքում հայտարարեց ՀՀ նախագահի թեկնածու, «Ժառանգության» առաջնորդ Րաֆֆի Հովհաննիսյանը։

Նա հայտարարեց նաև, որ ինքը փորձեց լուծում գտնել. «Ես իմ ոտքով գնացի Բաղրամյան պողոտա ու ասացի` ճանաչեք ժողովրդի հաղթանակը, եթե չեք վախենում` նշանակեք նոր ընտրություն: Ամեն ինչը «ոչ» էր»: Ր.Հովհաննիսյանը վստահեցրեց, որ իշխանություններին այլևս ասելիք չունի և այսուհետ կգնա Բաղրամյան պողոտայում, Հանրապետության հրապարակում գտնվող պետական գրասենյակներ, քաղաքապետարան միայն որպես ժողովրդի ներկայացուցիչ, այլ ոչ թե ինչ-որ բան խնդրելու: «Եթե ինքը (Սերժ Սարգսյանը) ասելիք ունի, սիրով կլսեմ, հարգանքով կլսեմ, բայց կլսեմ իրեն Ազատության հրապարակում, ուրիշ ոչ մի տեղ»,- հայտարարեց նա:

Ր. Հովհաննիսյանը նաև հայտարարեց, որ մինչև ապրիլի 9-ը Սերժ Սարգսյանը ոչ թե իր, այլ Հայաստանի ժողովրդի գերակշիռ մեծամասնության պահանջով և արդար քվեով պետք է ինքնաբացարկ տա և ճանաչի Հայաստանի ժողովրդի հաղթանակը:

«Ես մինչև մարտի 31-ը` Սուրբ Հարության տոնը` Զատիկը, և դրանից հետո` մինչև ապրիլի 9-ը, եթե իրենք ուժը չգտան իրենց մեջ, պիտի աղոթեմ նրանց համար: Ես այս տարի, հավանաբար,Սուրբ Զատկվա պատարագի չհասնեմ, եթե մինչև մարտի 31-ը պարոն Սարգսյանը դուխը, ողնաշարը, հայրենիքի սերը չունեցավ ինքնաբացարկ անելու, ուրեմն ես միայն մի խնդրանք ունեմ` թող նա Վեհափառին ասի, որ երբ մենք Սուրբ տաճարում ենք, պետք չկա խմել ՀՀ նախագահի կամ որևէ մի մարդու կենացը, մի խմեք իմ կենացը: Հայրապետ, Դուք էլ ասեք Սերժ Սարգսյանին, որ եկեղեցին անջատ է պետությունից, ոչ թե գործիք է իշխանության»:

Ր.Հովհաննիսյանը հայտարարեց, որ այսօրվանից մնում է Ազատության հրապարակում և չի ուտելու. «Ես հայտարարում եմ ոչ թե իմ հացադուլը, այլ իմ կեղծիքադուլը, վախադուլը և ստադուլը: Քանի դեռ պարոն Սարգսյանը ինքնաբացարկ չի արել հայրենիքի և ժողովրդի, իր ու իմ թոռնիկների,  երեխաների ապագայի համար, ես մնալու եմ Ազատության հրապարակում, հաց չեմ ուտելու և կեղծիք, սուտ ու սպառնալիք չեմ ընդունելու որևէ մեկից»:

Նա նշեց նաև, որ այս ընթացքում, որպես համազգային հրամայական, Ազատության հրապարակում կազմելու են ազգային համաձայնության իրենց վարչակարգը: Անդրադառնալով մարտի 11-ին Սահմանադրական դատարանում իր և ՀՀ նախագահի մեկ այլ թեկնածու` Անդրիաս Ղուկասյանի դիմումների հիման վրա միավորված գործի դատաքննությանը, նա ասաց. «Եթե ՍԴ-ն չուղղի իր հետագիծը ու հակասահմանադրական, հակապետական վճիռ կայացնի, խեղելով ժողովրդի իրավունքը և ընտրությունը, իրեն նույնպես պետք է ասենք «ցտեսություն» ու նաև մեր դատարանը այստեղ միասին պետք է ստեղծենք»,- հայտարարեց Րաֆֆի Հովհաննիսյանը:

Նա հայտնեց, որ մարտի 15-ին` ժամը 17-ին, կայանալիք հաջորդ հանրահավաքում համատեղ կքննարկեն առաջիկա անելիքը, Երևանի ավագանու ընտրությունները, ՍԴ-ի կայացրած որոշումը. «Եվ արդեն միասին կանցնենք գործողությունների, որոշումների»:

Իր ելույթից հետո նա որդու` Կարինի, ուղեկցությամբ զբաղեցրեց Ազատության հրապարակի նստարաններից մեկը: Նրա շուրջ խմբվել են հանրահավաքի մասնակիցները և հորդորում հետ կանգնել հացադուլ անելու քայլից և չգնալ ինքնազոհության, բայց Ր.Հովհաննիսյանն անդրդվելի է: