Փաստ ինֆո

Մարտի 10-ից ուժի մեջ կմտնեն Հայաստանի Հանրապետության քրեական օրենսգրքում փետրվարի 5-ին Ազգային ժողովի կողմից ընդունված փոփոխություններն ու լրացումները:

Փոփոխություններով և լրացումներով Քրեական օրենսգրքի որոշ հոդվածներ համապատասխանեցվել են Սահմանադրությանը, ինչպես նաև վերացվել են Քրեական օրենսգրքի ընդհանուր և հատուկ մասերի մի շարք դրույթների միջև առկա հակասությունները` բացառելով նաև սխալ պատժատեսակների և պատժաչափերի նշանակման հնարավորությունը:

Այսպես` վերացվում է ՀՀ քրեական օրենսգրքի 165-րդ հոդվածի` անչափահասին հանցանքի կատարմանը ներգրավելը, 2-րդ մասի, 291-րդ հոդվածի` ընդերքի պահպանման և օգտագործման կանոնները խախտելը, 2-րդ մասի, 294-րդ հոդվածի` ապօրինի որսը, 2-րդ մասի, 296-րդ հոդվածի` ծառերի, թփերի և բուսածածկի ապօրինի հատումը, 3-րդ մասի, 314.1-րդ հոդվածի` այլ պետության քաղաքացիություն ընդունելու կամ ստանալու դեպքում օրենքով սահմանված ժամկետում ՀՀ կառավարության լիազոր մարմնին չհայտնելը, և Քրեական օրենսգրքի ընդհանուր մասի 52-րդ հոդվածի 2-րդ մասի միջև առկա հակասությունը` որպես լրացուցիչ պատիժ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու ժամկետների հետ կապված:

ՀՀ քրեական օրենսգրքի 315.2-րդ հոդվածում` պետական կամ համայնքային սեփականություն հանդիսացող հողամասերի ինքնակամ զավթումը, ինչպես նաև շենքերի և շինությունների ինքնակամ կառուցումը կասեցնելու, կանխարգելելու ուղղությամբ օրենքով սահմանված կարգով միջոցներ չձեռնարկելը, որպես լրացուցիչ պատիժ սահմանվում է առավելագույնը երեք տարի ժամկետով որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելը: Մինչ այժմ գործող 315.2-րդ հոդվածում լրացուցիչ պատիժն ընդհանրապես բացակայում էր:

Վերացվել է 294-րդ հոդվածի 1-ին մասի և քրեական օրենսգրքի 57-րդ հոդվածի 1-ին մասի միջև առկա հակասությունը` կապված կալանքի առավելագույն թույլատրելի ժամկետի հետ:

Վերացվել է նաև քրեական օրենսգրքի 332-րդ հոդվածի` արդարադատության իրականացմանը և քննությանը խոչընդոտելը, 3-րդ մասի և քրեական օրենսգրքի 51-րդ հոդվածի 1-ին մասի միջև առկա հակասությունը: 332-րդ հոդվածի 3-րդ մասում նկարագրված է ծանր հանցագործություն, սակայն միաժամանակ հոդվածի նույն մասով որպես պատիժ նախատեսված էր տուգանք, այն դեպքում, երբ օրենսգրքի 51-րդ հոդվածի 1-ին մասի համաձայն տուգանքը նշանակվում է ոչ մեծ և միջին ծանրության հանցանքների համար:

Ըստ այդմ, արդարադատության իրականացմանը խոչընդոտելու նպատակով դատարանի գործունեությանը ցանկացած ձևով միջամտելը կամ գործի բազմակողմանի, լրիվ և օբյեկտիվ քննությանը խոչընդոտելու նպատակով դատախազի, քննիչի կամ հետաքննություն կատարող անձի գործունեությանը ցանկացած ձևով միջամտելը, որոնք կատարվել են անձի կողմից իր պաշտոնեական դիրքն օգտագործելով՝ պատժվում են ազատազրկմամբ` երկուսից վեց տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով: