Փաստ ինֆո

ՀՀ Վերաքննիչ քրեական դատարանում՝ դատավոր  Արշակ Խաչատրյանի նախագահությամբ, այսօր սկսվեց ՀՀ ԱԱԾ քննիչ Վլադիմիր Կոթոլյանի գործով կրկնակի բողոքների քննությունը:

Մեղադրող Աշոտ Նադոյանը միջնորդում է բեկանել Երևանի Կենտրոն և Նորք Մարաշ վարչական շրջանների ընդհանուր իրավասության դատարանի դեկտեմբերի 13-ի դատավճիռը (նախագահող  դատավոր Մխիթար Պապոյան), որով  ՀՀ քրեական  օրենսգրքի 311-րդ  հոդվածի  4-րդ մասի 2-րդ կետով՝  առանձնապես խոշոր չափերով  կաշառք  ստանալու  մեղադրանքը  վերաորակվել էր  ՀՀ քրեական  օրենսգրքի 178-րդ  հոդվածի  2-րդ մասի 2-րդ և 5-րդ կետերով մեղադրանքի՝ խարդախություն՝ խոշոր չափերով և կաշառք ստանալու պատրվակով:

Վ.Կոթոլյանը  դատապարտվել էր  5 տարվա ազատազրկման,  համաներման կիրառմամբ  պատժաչափի չկրած մասը կրճատվել էր մեկ երրորդով: Մեղադրողը միջնորդում է   Վլադիմիր Կոթոլյանին մեղավոր ճանաչել նախկին՝ կաշառք  ստանալու մեղադրանքով և  նրան դատապարտել ազատազրկման 7 տարի ժամկետով` անձնական գույքի մեկ երրորդ մասի բռնագրավմամբ , սակայն ոչ ավելի 1.484.560 ՀՀ դրամ գումարից: Իսկ պաշտպանական կողմը միջնորդում է ամբողջությամբ բեկանել հիշյալ դատավճիռը, Վլադիմիր Կոթոլյանի նկատմամբ քրեական գործի վարույթը կարճել և դադարեցնել քրեական հետապնդումը: Մերժելու դեպքում կողմը միջնորդում է նշանակել նույն հոդվածի սանկցիայով նախատեսված ազատազրկման հետ չկապված պատիժ` տուգանք կամ նվազագույն կամ համաչափ պատիժ:

Մեղադրող Աշոտ Նադոյանը գտնում է,  որմեղադրանքը  վերաորակելով դատական սխալ է թույլ տրվել: Ըստ նրա, դատարանի հետևությունները չեն համապատասխանում հետազոտված ապացույցներին,  սխալ է կիրառվել  քրեական օրենքը: Պաշտպանական  կողմը ևս գտնում է, որ դատարանի հետևությունները չեն համապատասխանում հետազոտված ապացույցներին՝ քրեական  գործը շինծու է, նախաքննությունը կատարվել է միակողմանի, մեղադրական թեքումով, եւ հիմնված է կասկածների ու ենթադրությունների  վրա,  ուստի դատարանը պետք է կարճի քրեական  գործը և դադարեցնի Վ.Կոթոլյանի քրեական հետապնդումը:  
 
Վերաքննիչ բողոքների քննությունը վաղը կշարունակվի, ապա` դատարանն ըստ ամենայնի կհեռանա  խորհրդակցական  սենյակ՝ բողոքների վերաբերյալ որոշում կայացնելու: