Փաստ ինֆո

Վանաձորցի 50-ամյա Փնջիկ Թերոյանը 2012թ. ապրիլի 4-ին ՀՀ ոստիկանության Լոռու մարզային վարչությունում հայտարարություն է տվել, որ 2011թ. փետրվար-մարտ ամիսների ընթացքում ավտոմեքենաներ գնելու, վերավաճառելու և ստացած հասույթի կեսն իրեն տրամադրելու նպատակով նույն քաղաքի բնակիչ Արեն Աղաջանյանին տվել է 22 000 ԱՄՆ դոլար, սակայն վերջինս այդ գումարով գնված մեքենան առանց իր գիտության վաճառել է և ստացված գումարը խաբեությամբ հափշտակել: Ամիսներ տևած նախաքննությունը, սակայն, Փ. Թերոյանի օգտին չի ավարտվել:

Լոռու մարզի քննչական բաժնում հարուցված քրեական գործի վարույթը 2013թ. փետրվարի 21-ին կարճվել է` հանցակազմի բացակայության հիմքով:

Թերթի թղթակցի հետ զրույցում Փ. Թերոյանը նշել է, որ նախաքննական մարմինը անհիմն, առանց օբյեկտիվ քննություն կատարելու նման որոշում է կայացրել` հաշվի չառնելով այն, որ ինքը զրկվել է բավականին խոշոր գումարից:

Կինը տեղեկացրել է նաև, որ երկարատև սպասումներից հետո է միայն իրեն հաջողվել ստանալ կարճված քրեական գործի նյութերի լուսապատճենները` նշելով, որ կարճման մասին որոշումը ստանալուց հետո մինչև այս տարվա փետրվարի 26-ը նախաքննական մարմինը անընդհատ ձգձգել է քրեական գործի լուսապատճենների տրամադրումը:

«Սակայն լուսապատճենները ստանալուց հետո էլ Փնջիկ Թերոյանի անհանգստությունները չեն ավարտվել»,- գրում է թերթը:

«Գործիս նյութերը տրամադրել են աղավաղված, անկանոն են, կեղծ, մի էջից մի քանի օրինակ, ներկայացվել է ոչ պատշաճ վիճակում, առկա է չկնիքված լիազորագիր և այլն»,- թղթակցին ասել է Փ. Թերոյանը: