Փաստ ինֆո

ՀՀ Նախագահի թեկնածու Րաֆֆի Հովհաննիսյանը 2013թ. մարտի 4-ին դիմել է ՀՀ սահմանադրական դատարան` ՀՀ Սահմանադրության 100-րդ հոդվածի 3.1-րդ կետի եւ 101-րդ հոդվածի 9-րդ կետի հիմքերով իրավունք ունենալով վիճարկել «Հայաստանի Հանրապետության Նախագահ ընտրվելու մասին» ՀՀ կենտրոնական ընտրական հանձնաժողովի 25.02.2013թ. թիվ 62-Ա որոշումը:

ՀՀ ՍԴ մամուլի ծառայությունից «Pastinfo.am»-ին հայտնեցին, որ ՀՀ սահմանադրական դատարանի կանոնակարգի 19-րդ հոդվածի հիման վրա դիմումի նախնական ուսումնասիրումը պետք է ավարտվի ոչ ուշ, քան դիմումի գրանցումից 24 ժամ հետո: Այնուհետև Սահմանադրական դատարանը «Սահմանադրական դատարանի մասին» ՀՀ օրենքի 31-րդ հոդվածի և ՀՀ սահմանադրական դատարանի կանոնակարգի 20-րդ հոդվածի հիման վրա աշխատակարգային նիստում քննության կառնի գործը քննության ընդունելու հարցը:

Նշենք, որ Ր.Հովհաննիսյանի նախընտրական շտաբի խոսնակ Հովսեփ Խուրշուդյանը և իրավախորհրդատու, ՀՀ փաստաբանների պալատի անդամ Կարեն Մեժլումյանը դիմումը հանձնելուց հետո ՍԴ-ի շենքի դիմաց պատասխանեցին լրագրողների հարցերին:

Կ.Մեժլումյանը, մասնավորապես, հայտնեց, որ 16 էջից բաղկացած դիմումի մեջ կան բոլոր իրավական հիմքերը` ԿԸՀ-ի որոշումը չեղյալ ճանաչելու համար:

Հ.Խուրշուդյանն էլ հայտնեց, որ առաջիկայում դիմումը կհրապարակվի: Նա նշեց նաև, որ օրեցօր ի հայտ են գալիս ընտրախախտումների նոր փաստեր:

Նշենք նաև, որ ՍԴ-ի հարող տարածքում ծառայություն են իրականացնում ոստիկանները` Երևանի փոխոստիկանապետ Վալերի Օսիպյանի ղեկավարությամբ: Նրանք թույլ չէին տալիս Ր.Հովհաննիսյանի մի քանի տասնյակ համակիրներին մոտենալ ՍԴ-ի շենքին: