Փաստ ինֆո

ՈՒկրաինայի նախագահ Վիկտոր Յանուկովիչը մարտի 1-ին Կիևում կայացած ասուլիսում հայտարարել է, որ նոր Քրեադատավարական օրենսգիրքը մարդասիրական մոտեցման հնարավորություն է ընձեռնում տնտեսական հանցագործություններ կատարելու համար դատապարտված անձանց նկատմամբ: Դա, սակայն, իրագործելի է միայն այն դեպքում, երբ դատապարտվածը փոխհատուցի պետությանը հասցրած վնասը:

Նախագահն ընդգծել է, որ երկրի կառավարության նախկին ղեկավար Յուլիա Տիմոշենկոյին արժի մտածել այս մասին:

Նախկին վարչապետը դատապարտվել է յոթ տարվա ազատազրկման` Ռուսաստանի հետ գազի մատակարարման պայմանագրեր կնքելիս իրավասությունները չարաշահելու մեղադրանքով: Դատարանը նաև պարտադրել է նրան փոխհատուցել «ՈՒկրաինայի Նավթագազ»-ին 1,5 միլիարդ հրիվեն, ինչը հավասարազոր է 190 մլն ԱՄՆ դոլարին:

Մեկնաբանելով դեռևս 2011թ.-ին կայացված դատավճիռը` Յանուկովիչը հայտարարել է, թե Տիմոշենկոն «տանջվում է կատարածի համար»: Նախագահը, մասնավորապես, հայտնել է, որ 2009թ.-ին Տիմոշենկոյի կողմից ստորագրված պայմանագիրը տարեկան շուրջ 6 մլրդ ԱՄՆ դոլարի վնաս է հասցնում ՈՒկրաինային: Այդ գումարները կարող էին ուղղվել երկրի զարգացմանը, աշխատավարձերին և թոշակներին, մինչդեռ, պայմանագրի համաձայն, գնում են Ռուսաստան: «Lenta.ru»-ն նկատում է, որ Տիմոշենկոն, վարչապետ եղած ժամանակ, այդ պայմանագիրն անձամբ չի ստորագրել: Այն կնքել են ՈՒկրաինայի «Նավթագազ»-ը և Ռուսաստանի «Գազպրոմ»-ը:

Նույն աղբյուրի փոխանցմամբ, Տիմոշենկոյի նկատմամբ ներկայումս ևս մի քանի գործ է քննվում: Նրան, մասնավորապես, մեղադրում են 1996թ.-ին պատգամավոր Եվգենի Շչերբանի սպանությանն առնչություն ունենալու մեջ: Այս գործով վկաների հարցաքննությունն ընթանում է Կիևի շրջանային դատարաններից մեկում:

ԶԼՄ-ների տեղեկություններով` Տիմոշենկոյին կարող են առաջիկայում Խարկովի հիվանդանոցից, որտեղ նա, ողնաշարի հիվանդության պատճառով, գտնվում է արդեն 9 ամիս, տեղափոխել մայրաքաղաք` դատական նիստերին մասնակցելու համար: