Փաստ ինֆո

«Մարտի 1-ի էջն իրավական տեսակետից փակված չի կարող լինել` մինչև բացահայտումներ չլինեն: Քաղաքական տեսակետից բնական ենք համարում, որ քաղաքական շահարկումների առիթ կտան, բայց շատ վիրավորվում ենք, որ քաղաքական գործիքի են փորձում վերածել մարտի 1-ը»,-2008թ.-ի մարտիմեկյան դեպքերի հինգերորդ տարելիցի օրը կայացած ճեպազրույցում ասաց Ազգային ժողովի ՀՀԿ խմբակցության ղեկավար Գալուստ Սահակյանը:

Ի պատասխան լրագրողի հարցին, նա ընդգծեց, որ քաղաքական տեսանկյունից իրենք հարցը փակված են համարում, որովհետև «քաղաքական պրոցեսներն այնպես չեն, որ օրեր շարունակ պետք է գնան»: «Նրանք, ովքեր շահարկում են այս երևույթը, այսինքն` քաղաքականացնում են, դա էլ ենք նորմալ համարում, բայց գործիք դարձնել միջադեպը, կարծում եմ, վիրավորական է մեր ամբողջ ազգի համար»,-ընդգծեց Գ.Սահակյանը:

ՀՀԿ-ի կոալիցիոն գործընկեր` «Օրինաց երկիր» խմբակցության ղեկավար Հեղինե Բիշարյանն էլ նշեց, որ պետք է ամեն ինչ արվի, որպեսզի «երբեք մեր հայոց պատմության էջերում նման արյունոտ էջ չլինի»: Հարցին, թե ում է համարում այդ ողբերգական դեպքերի մեղավորը, Հ.Բիշարյանը հայտարարեց, որ ինքը ոչ դատավոր է, ոչ էլ` դատախազ. «Ես չեմ կարող որևէ մեկին մեղադրել, տեղի են ունեցել բախումներ, եղել են զոհեր, համապատասխան մարմինները զբաղվել են դրանով, համապատասխան մարդիկ դատապարտված են: Գուցե չի բավարարում այն, ինչ տեղի է ունեցել, կամ ովքեր որ դատապարտվել են, դրանով չեն լուծվել այն բոլոր դժգոհությունները, որոնք դեռևս առկա են»:

Ճշտող հարցին, թե ովքեր են դատապարտված մարտիմեկյան դեպքերի համար, «Օրինաց երկիր» խմբակցության ղեկավարը նախ խնդրեց կրկնել հարցը, ինչից հետո ասաց. «Դե, դատապարտված են նրանով, որքանով որ մենք պատկերացում ունենք, թե ինչ է տեղի ունեցել, և որոշակի նույնիսկ Ազգային ժողովի ժամանակավոր հանձնաժողովը տվեց իր ենթադրությունները և դրանով, գուցե, բառս ուղղակի հասկացվեց: Եթե ուղղակի է հասկացվել, ետ եմ վերցնում»:

ՀՅԴ խմբակցության ղեկավար Արմեն Ռուստամյանն էլ նշեց, որ իր համար էլ շատ անհասկանալի է, թե ինչու չի բացահայտվում այդ գործը. «Թվում էր, թե բոլորի աչքի առաջ կատարված իրադարձություն էր, և առնվազն պետությունը պարտավոր էր տեսաձայնագրել, ամեն ինչ ունենալ, փաստացի հիմնավորված բոլոր ապացույցները ձեռք բերել: Սա իսկապես մինչև հիմա անհասկանալի է մնացել ոչ միայն մեզ համար, այլև միջազգային կառույցներում անընդհատ մնում է օրակարգի վրա»:

Ըստ դաշնակցական պատգամավորի՝ ուղղակի անհասկանալի է այս դարում 10 զոհերի մահվան հանգամանքները չբացահայտվելը: «Խնդիրն այն է, որ, կասկածանքը պահպանվելով, այս էջը չենք կարողանում փակել, որովհետև անընդհատ այդ ծանր բեռը քաղաքական դաշտի, մեր երկրի, ժողովրդի վրա է ծանրանում»,-ընդգծեց Ա.Ռուստամյանը: